MAWKYRWAT: Ha ka sngi kut jong ka lympung ialehkai kynjatbol jong ka XVI Mawlangwir Football Invitation Tournament 2023-2024 kala long shisha kaba shongshit bad kaba la pyn hun jrut ia ki hajar ki paidbah riew ieid Football kiba la wan ban sakhi hapdeng ki artylli ki kynhun ialehkai kiba la paw hapoh ka jylla Meghalaya ka Shillong Lajong FC pyrshah iaka Golden lion FC kaba la long mynta ka sngi ka 22 tarik u îaiong 2024 ha Madan Rowell Lyngdoh Stadium Mawlangwir South West Khasi Hills District.
Ha kane ka sngi la wan pynhap pyrda noh da u bah Hamlet Dohling President Meghalaya Football Association ha ryngkat da ka jing ia donlang ki nong kitkam jong ka Mawlangwir Sports Club bad ki wei de ki reiw rangbah kiba la shah khot sngewbha.
U bah Hamlet Dohling haba kren ha kane ka sngi u la ong ba naka liang ka Meghalaya Football Association kan pynlong ia ka lympung ialehkai naka bynta ki under 14 bad under 16 khnang ban kyntiew ia ki samla ha ki kam ialehkai Sport hapoh ka jylla Meghalaya.
Ha pdeng ka jing ialehkai ha madan ha ka kylla step watla hapdeng ka jing iakhun kaba mar ia biang bor ha baroh artylli ki kynhun kim shem la lah ban thep ia ki kol ki jong ki. Dei ha ka kylla mit ha ka minute kaba 56 ka Shillong Lajong FC ka la ïoh ban thep ïa ka kol lyngba u Figo Syndai katba ka Golden Lion FC ka la ïoh ïa ka kol na u Shin Sohktung ha ka minit kaba 75 bad ka kol kaba ar na u J. Nongtdu ha ka minit kaba 90+2 minit. Tad ha duh kaba kut jong ka jing ialehkai ka Shillong Lajong FC kam lah shuh ban pynphai ia ka kol ka jong ki ha kaba ka Golden lion FC kala ioh ia ka nam lah duh da 2 kol la 1 kol pyrshah ia ka Shillong Lajong FC.
Nalor ka Trophy ka Golden lion FC ka la ioh rah ruh ia ka song pisa kaba T.10 lak tyngka bad ka Shillong Lajong FC T.lak Tyngka.
Ka Mawlangwir Sports Club kala ioh ruh ban ai khunsam ia u Collin Lyngdoh kum u Best Player jong ka Shillong Lajong FC bad Best Goalkeeper sha u Padam Chettri naka Golden lion FC bad Top Score jong ka Tournament dei u Sheen Sohktung jong ka Golden Lion FC.
10 lak rah ka Golden Lion FC na Madan Rowell Lyngdoh Stadium Mawlangwir
