SHILLONG: Ka jingialang paidbah ka synjuk regional democratic alliance (RDA) kynthup ia ka UDP bad ka HSPDP ka la shongshit puk ha Mairang ha kane ka sngi Hatmajai, da ka jingtuid jong ki paidbah ban pyrta ha ka shap ka Bom.
Ha kane ka jingialang, nalor u kyrtong, u bah Robertjune Kharjahrin, la don u President ka UDP u bah Metbah Lyngdoh, u bah Kyrmen Shylla, u myntri sorkar, u President ka HSPDP u bah K Plasting Pangiang bad kiwei.
Haba kren ha kane ka jingialang, u bah Metbah ula ong ba wat khein dewthala ia ka elekshon MP namar ba ka jaitbynriew ka ioh ban jied tang ia uwei ban leit iasaid sha dorbar bah ka Parliament ban iasaid ia ka kam iap kam im.
U la ong ba ka dei ka riti synshar kaba tehsong ia ka ri bad kaba burom ia ki jaitbynriew rit paid, kumba long ka jaitbynriew Khasi. U la ong ba ka jylla Meghalaya ka don 36 lak ngut ki nongshong shnong bad ki Khasi-Jaintia ki don tang 22 lak ngut katba ka Assam kaba don markhap ka don 3.5 klur ngut ki nongshong shnong bad dei kane ka daw, ba ki paidbah kim dei ban khein dewthala, ban leh shongshit ia ka elekshon MP. Ha Assam, ki don 45 lak ngut ki poiwir kiban shah beh shnong bad lada kin wan sha kane ka jylla, la kut ka jaitbynriew. Dei na kane ka daw, ba la donkam ban pyntreikam ia ka Inner Line Permit, ban iada ia ka jaitbynriew rit paid. Ka nongrim ka RDA ka long ruh ban iasaid ban pynneh ban iada ia ka riti dustur, bad ban ia mane laitluid katkum ka jingkwah jong u briew.
Ula maham ruh ba ki don kiba la pynkylla ia u paidbah sha u paidbhur, kaban poi sha ka jingmynsaw. Ki don kiba shu bein ia ki para briew, bien ia ki nongialam niam, ia ki nongsynshar shnong bad ia ki seng bhalang ruh ban pynshit ia u paidbah. U la ong ba don kiba ong ba lada don ba ai pisa shim beit tangba ka vote ai shawei bad kane ka dei ka jinghikai kaba bakla namar ba ym ju dei ban shim ia ka pisa haba kam dei ban shim ioh pang ioh khrew pynban.
Shit puk u paidbah ha Mairang ban pyrta ha ka Bom
