SHILLONG: U President ka seng HSPDP u bah K Plasting Pangiang u la ong ba na bynta ka jingiatylli ka ri bad ka jaitbynriew Khasi-Jaintia, u sing um sngew pher ban tem bom ha kane ka MP elekshon sha ka Lok Sabha.
Haba kren ha ka jingialang paidbah ha Mairang, kaba la sakhi da ki hajar ngut ha ka sngi Hatmajai, u bah Plasting u la ong ba hadien ba la iathir sabha na bynta ka jingbit jingbiang ka jaitbynriew, kaba dang iaksaid ban ioh ia ka jingiada, ka HSPDP ka la rai rangbah ban iatreilang bad ka UDP hapoh ka shatri ka Regional Democratic Alliance (RDA) khnang ban pynjop ia u kyrtong, u bah Robertjune Kharjahrin ha ka shap ka Bom.
U la ther ia u MP ka Congress uba la mihkhmat 15 snem khlem ler eiei ban iasaid ia ki mat ka jaitbynriew, bad ka jingjop ka party nabar ka la pynjah kyrteng ia ka jaitbynriew Khasi hakhmat ka pyrthei baiar ka ri India. U la ong ba ka NPP bad ka Congress mynta ki iatreilang ha KHADC ban kyntait ia ki seng riewlum, bad ki paidbah ki dei ban husiar na kine ki party.
Ha kajuh ka por, u la ong ba don ka party thymmai kaba phalup jyndei ia kiwei ba kim ieid ri katba ialade ki dang shu mih dang shi snem ar snem, bad kane ka dei ka jingkren ibein ia kiwei kiba la iakhun dohiap ban ioh ia ka jylla Meghalaya ha ki phew snem ba la leit noh. U President kane ka seng thymmai lei, u dei uba la don ha ka HSPDP hynrei tang ar snem u phet noh namar ba um lah ban ialam khlem don ba beh ia u, bad kum ia kine ki briew dei ban husiar na ki ktien jali jaum jong ki ban pynshit ia ki briew.
Na bynta ka ri, u Sing um sngew pher ban tem Bom
