SHILLONG: U nongialam ka NPP, uba dei ruh u MLA barim ka Mawlai u bah Embhahlang Syiemlieh u la sngew ktah mynsiem haduh katta katta ia ka jingshah kynthoh shah kren bein ki nongialam Balang ha ki briew kiba kam ba ki dei ki nongkyrshan Prah jong ka Voice of the People Party (VPP).
Haba kren ialap elekshon ia ka kyrtong MP ka kong Ampareen Lyngdoh ha Mawlai mynta ka sngi, u bah Embhahlang u la ong ba u nongialam ka VPP u la kynthoh ia ki nongialam Balang ki don bynta ha kaba pynsniew ia ka jaitbynriew, bad u la kynnoh ruh ba ki nongialam Balang ki don bynta ban sam kyiad samp pisa ha ka por elekshon.
Ula buh jingkylli, ha kano ka rukom u kynnoh ba ki nongialam Balang ki pynsniew ia ka jaitbynriew, katne kila trei shitom ban kyntiew ia ka jingnang jingstad, ka koit ka khiah bad ka imlang sahlang bad kane ka dei ka jingniew bein ia ki.
U bah Embhahlang u la ong ba la iohi ruh ha ki jingshah kynthoh bad kren khlem akor ha social media ia uwei u nongialam Balang Katholik, u Fr. Richard Majaw, uba ong ba ka elekshon kam dei ban wanrah ia ka jingiapher jaitbynriew. U la ong ba lada u nongialam ka VPP u kynthah ia ki nongialam Balang, katno lei ia ki nongkyrshan lei kan pynshlur ia ki nongkyrshan ruh ban kren katba mon, wat da ki ktien sih ruh.
Haba khot ia ki paidbah ban kyntait shi syndon ia ka VPP, u bah Embhahlang u la ong ba ha kane ka elekshon ki paidbah ki dei ban kyntait shi syndon ia kane ka kynhun ka bym salia shuh ban kren pyrshah ia ki nongialam, ia ki nongialam Balang. Ym tang katta, haba don ka jingjia ba sngewsih, ki nongkyrshan jong kane ka Party kila pyrta Prah pynban. Kila kren ruh da ki ktien khlem akor ia ka kyrtong ka NPP, ka kong Ampareen Lyngdoh.
Sngew jaw ummat u bah Embhah ba shah kren bein ki nongialam Balang ha ka VPP
