SHILLONG: U kyrtong MP ka Congress na Shillong Parliamentary constituency, u bah Vincent H Pala u la maham ia ki paidbah ka Mawlai ba kan long ka jingma lada kin jied ia kiwei pat ki party, kiba iajan bad ka BJP, namar ba khlem pep, kan pynduh pyndam ia ki hok jong ki rit paid.
Hadien ba la wai ka jingialang, u bah Pala u la leit rung bad ai khublei ia ki nongshong dukan ha Mawlai Phudmuri khamtam ki nongdie doh masi, die sniang namar ba ka doh kaba pynmih na mawlai ka dei kaba bna nam ia ka jingbha jongka.
Haba kren ha ka jingialap elekshon ha Mawlai mynta ka janmiet, u bah Pala u la ong ba ha kine ki shiphew snem naduh ba ka Congress kam don ha ka bor, ka skhim 100 sngi ne ka MGNREGS ruh ka la ring sdot khait bad kane ka la pyndukha mynsiem ia kiba duk kiba bylla sngi.
U la ong ba ka Congress kan ai ia ka jingstad ha ki skulbah kumba long mynshwa, ym ban tuklar bad ka la buh thong tuh ban ban mang T.10 klur ban iarap ia kito kiba sdang kam ha man ki district khnang ba ki samla kin ioh kam ioh kam.
U bah Pala u la ong ba ka jingjulor ki samla ha kine ki san ki shiphew snem na u drok, ka long kaba jubor haduh katta katta bad halor kane, ka Congress kan sa wanrah da ki ain kiba satar bha ban pynshitom ia kiba donkti ban khaii beain ia u drok.
U la ong ba un iasaid tyngeh ha kane ka sien lada jop kum u MP ban pynrung noh ia ka ktien Khasi ha ka khyrnit ba phra ka riti synshar ka ri namar ba ka la don lypa ha ka thup jong ki 32 tylli ki jait ktien ha ka sorkar pdeng.
Shuh shuh u la ong ba don kiba buh jingkylli ia u, ha kine ki 15 snem u leh aiu ha Delhi, hynrei kim tip ia ki kam kiba bun bah ba u la leh ban iasaid ia ki jingdonkam ka jylla bad kumjuh ka thain shatei lammihngi ka India.
U la ong ba ha kane ka elekshon, u la ong ba ym dei shuh ban ai lada ailad ia ka BJP ka kan wan ha ka bor namar ba ka la dep pass ia ki ain iakjakor bapher bapher kum ha Jharkhand kala pass ia ka UCC. U bah Pala u la ong ba ha kine ki shiphew snem ba synshar ka BJP, ki Khristan kila shah pyndik, haba kaba kim ioh lad shuh ban ioh jingiarap nabar ri na ka jingpyrkhing ka BJP ia ka ain FCRA wat tang ban shna iing mane ruh bad mynta ha Assam ka sorkar kala mut ban pynmih ia kawei ka ain, ban pynduh ia ka kyrdan Schedule Caste bad Schedule Tribe ia kiba la long Khristan.
U la maham ba ka thong ka BJP ka long ban jop 370 ngut ki MP khnang ba kan lah ban pynkylla ia ka riti synshar ka ri India, hynrei mynta ka la hiar ha kiba bun ki jylla namar ba ki party kiba iatreilang bad ka, kila phet noh hadien ba kila sngewthuh ba ka la iaid ha ka lynti ka bym iahap.
U la ong ba ka policy kane ka sorkar ka long ban pynjynjar ia ki paidbah bad ula kyrpad ia ki paidbah ban ai biang ia ka jingkyrshan ia ba un trei borbah ia ka jylla bad ka thain. Wat ong ba ka dei ka elekshon jong u bah Pala, hynrei ka dei ka elekshon jong phi paidbah, la ong u bah Pala.
Kyrpad u bah Pala ban ai biang ka jingkyrshan, ai khublei ia ki nongshong dukan shait ha Mawlai
