SHILLONG: U kyrtong MP ka Congress na Shillong Parliamentary constituency u bah Vincent H Pala u la ong ba ka UCC kan tehlakam ha ka shongkha shongman ha ka hiar pateng bad ka ioh ka kot ha ka iing ka sem.
Haba kren ha ka jingialap elekshon ha Jowai, ha ka sngi Thohdieng, u bah Pala u la ong ba ka BJP ka la buh thong ban ioh 2/3 bynta ki MP ha Parliament, kin sa pynkylla ia ka riti synshar ka ri India, sha ka ri Hindu ia ka ri India.
U la kam ba ka BJP ka buh thong ban pynkylla kawei ka ri, kawei ka niam bad kawei ka ktien, bad ki paidbah ki dei ban pyrkhat bha halor kane.
Shuh shuh u la ong ba ka BJP ka la thmu ban pynkylla Hindu ia ka ri India, kumba long ka ri Muslim ha Pakistan, ha Afghanistan ha kaba kam don shuh ka jingsynshar paidbah.
Ha kajuh ka por, u la ong ba ka jingphet seng jong ki MLA na kawei ka party sha kawei pat, ka pynkulmar ia ki paidbah bad kine ki MLA ki kular ban leh ia kiei kiei hynrei khlem lerkam satia kumba la sakhi ia ka jingkular ban pyllait khang dewiong hynrei khlem lait haduh mynta. U la ong ba ym dei ban shongshit namar ba kan ialam pynban sha ka jingjynjar.
U la ong ba ka don ka jingpyrshang ban wanrah ia ka jingiapher jaitbynriew hapdeng ki Khasi bad Garo ha kaba ka jingrwai ka jylla Meghalaya, ka ktien Pnar kam shym la rung hynrei la pynrung tang ka Ktien Khasi bad Garo, bad kane ka dei ka jingthmu ban pyniapait ia ka jaitbynriew.
Ula maham ia ki paidbah ban ym ngop ha ka jingpynthame na bynta ka jingthmu ban pynpait ia ka jaitbynriew.
U la ong ba ym dei ban leh shongshit kumba la leh shongshit ka Hamas ba kyrshan ka Palestine ha ka por ba ki hiar thma ia ka Israel hynrei mynta ynda la ther sa ka Israel, da ki phew hajar kila iap bad kynmaw ka jingshongshit kan ialam bakla.
Wat leh shongshit kum ki Hamas, ioh shah ther kumba ka ther ka Israel, ong u bah Pala
