SHILLONG:Ka seng Bharatiya Janata Party (BJP) ka la pynbna ba kan kyrshan tylli ia ki kyrtong ka seng National People’s Party (NPP) na Shillong bad Tura Parliamentary constituency ha ka elekshon sha ka Lok Sabha kaban long ha u Iaiong ban wan.
Ia kane la pyntip u Nongaiktien ka BJP na Delhi u Dr. Sambit Patra ha ka x, mynta ka sngi. U Dr. Patra u la ong ba ia kane ka rai la shim da ka jingbthah u National President ka BJP u JP Nadda.
Kane ka mut ba ka BJP kam treh ban pynieng kyrtong ha Meghalaya ha kane ka kynti watla ki don katto katne kiba la pan tiket kynthup u bah AL Hek, myntri sorkar, ka Dr. Fenela L Nonglait, u President barim ka BJP Bah Ernest Mawrie, u President ka BJYM Mewaker Lyngdoh bad Sumitra Laloo na Shillong Parliamentary constituency bad kumjuh na Tura ba kynthup ia u MDC ka Tura Bernard N Marak, u MLA barim u Winnerson D Sangma bad u KC Boro, u MDC barim Boston Marak, Ria Sangma bad u Thomas Marak.
Ka BJP kan kyrshan ruh ia ka NPF ha Outer Manipur Constituency bad ia ka NDPP ha Nagaland.
Ka NPP kala pynieng ia ka MP ba mynta ka Agatha K Sangma na Tura bad ka Myntri Sorkar Kong Ampareen Lyngdoh na Shillong Parliamentary seat.
Yn kyrshan tylli ka BJP ia ka NPP na Shillong bad Tura ha ka elekshon MP
