SHILLONG: Ka kong Ampareen Lyngdoh mynta ka sngi ka la pyndep ia ka jingthep kyrteng kum ka kyrtong ka NPP sha ka Lok Sabha na Shillong Parliamentary Constituency kaban long ha ka 19 tarik Iaiong ban wan.
Haba kren hadien ba la dep thep kyrteng, ka kong Ampareen ka la ong ba kam kwah ban kynnoh ban kynthoh ne ban kren sniew ia kiwei ki kyrtong ne ki seng sain pyrthei, hynrei ka shap jongka ka dei ka Kot na ka NPP.
Ka la ong ba ka Uniphom ka lah ban long kaba jyrngam, kaba jngum, kaba saw huin huin hynrei ka jongka ka dei beit ka Kot bad ka la kyntu ia ki paidbah ban ai lem ia ka jingkyrshan ba kan long ka MP na jylla ban iasaid ia ki jingeh u paidbah.
Ka la ong ba ka la dep ban leit kynduh ia ki nongialam bapher bapher ha baroh 36 tylli ki konstitwensi naduh ki nongialam niam, ki nongialam seng sain pyrthei, bad ka shaniah ha u Blei ba un ai ia ka lad.
Haba pynpaw ba kam sngew dei ban iakynthah, ka kong Ampareen ka la ong ba kum ka kyrtong kan tyrwa ia la kijong ki mat ka bym don jingiadei eiei bad ka pisa namar ba ka mih ban shakri ia u paidbah, ym ban iatan tyllai, ym ban kynthah iano iano watla ki don kiba iakawang namar ba kila ia mlien ha ka por elekshon.
Ka la ong ruh ba ka NPP kam dei ka party nongwei hynrei ka dei ka party jong ki Khasi-Jaintia bad Garo kiba dei ki nongshong shnong jong kane ka jylla bad ka la pan ia ka jingkyrshan ba kan long ka MP longkmie ba nyngkong eh na ka jylla.
Ha kajuh ka por, ka la ong ba ki mat kiba iadei bad ka jaitbynriew, kan sa rah ban iasaid ynda u paidbah un ai ia ka jingjop.
Ka Uniform ka lah ban long kaba jyrngam, ba jngum, ba saw huin huin, ka jong nga te ka Kot: Ampareen
