SHILLONG: U President ka Meghalaya Pradesh Congress Committee (MPCC), u Bah Vincent H Pala u la ong ba ka seng Congress ka bthah ia ki nongialam ka party ba kim dei ban kren kulmar lane ban bein ban khoh ia kiba iakhun pyrshah ha ka por ba ki leit ban ialap na ka bynta ka election MP Lok Sabha.
Katkum ka jingong u Bah Pala uba dei u MP ba mynta na Shillong, tang namar ka jingkren kulmar ki paidbah ki lah ban kyntait watla ki mon ia ka seng Congress. U la ong ba ka seng Congress ka pher na kiwei ki seng sainpyrthei, namar kiwei ki seng khamtam ki seng riewlum ki lah ban kren katba ki mon, hynrei ka seng Congress kaba dei ka seng kaba heh hapoh ka ri India, ki nongialam ki hap ban kren da pyrkhat namar ki hap ban pyrkhat ia ka mynta bad ka lashai, bad kidei ban tip ruh ia kaei kaba ki kren.
Ha kajuh ka por u Nongialam ka Congress u la iathuh ba ki kyrtong jong ka seng Congress kin leit ban thep kyrteng ha ka 25 tarik mynta u bnai, kata ha Tura u Saleng A Sangma bad Shillong yn iakhun hi da u Bah Pala.