SHILLONG: Ka jingshna ka sorkar ia ka jingtei kaba skhem kaba itynnad ia ki nongshong dukan ha Iew Shyllong, kan ym phoida than lada ka die ka thied jongki, ka kamai ka kajih pat kami aid bha.
Ha ka jingiakren bad ki nongshong shong iew ha ka iew kaba rim bha ha nongbah Shillong, ka Iew Shyllong, Laitumkhrah, la sngewthuh ba ha kine ki snem, ka siew ka ka tda ka la hiar shaba palat naduh ba la kynrei ki nongdie khuti mutia ne ki nongdie madan ha surok.
Nalor ba katei ka iew kam don ka jaka ieng kali kaba biang, ka surok kaba kham kylluid, ka la khang lad ia ki briew ban leit rung ban thied ia ki marbam mardih, bad ka jingkharoi ki nongdie madan ha surok, ka la nang khang lad shuh shuh ia ki nongshong dukan ha Iew Shyllong.
Ha kane ka iew ba dang shna thymmai, ki don 183 tylli ki dukan bad ka jaka ieng kali kaban ngiam 100 tylli ki kali, bad ka jingtei ka dang iaid ia ka, ha ka jinglut kaban long T. 28.84 klur.
Ka President Ka Iew Shyllong Hynniewtrep Association, ka kong Ciona Jarain ka la ong ba ka iew ka la rit shaba palat ha kine ki sngi naduh ba la kynrei palat ki nongdie madan sha surok, ha kaba ki briew kim shlan shuh ban wan rung sha iew Shyllong, lait tang malu mala bad kane ka la ktah jur ia ka die ka thied jongki. Ki don ruh kiba khang noh ia ki dukan jongki, namar bym lah die shuh.
Ka la ong ba ka donkam ia ka bor ban pynbeit ia kane namar ba ki nongdie madan ruh kim dei ban shah ktah bad ki nongshong iew ha Iew Shyllong ruh, kim dei ban shah ktah.
Ki mar kiba kham thnem bha ha Iew Shyllong ki long ka iew dohkha, doh sniang, doh syiar, jhur bad kiwei pat. Ka la don ka jingpynkhreh na ka sorkar ban ym shah shuh ban die madan ha ka thain Laitumkhrah hadien ba la pyndep ia ka iew shyllong thymmai.
Ha ka jingshisha, ka sorkar kham mynshwa ka la buh thong ban plie noh ia kaneka iew ha u Rymphang mynta u snem hynrei kumba ka paw, ka dang shim por ban pyndep.
Khang bun ki dukan ha Iew Shyllong bym lah die shuh naba kynrei ki nongdie madan sha surok
