SHILLONG: Ka Supreme Court kan shong bishar lashai ka sngi halor ka Citizenship Amendment Act 2019, halor ka jingujor ka North East Students Organisation – NESO.
Ka NESO ka shatri jong ki seng samla pule ka thain shatei lammihngi ka India, ka la ujor pyrshah ia ka CAA ka sorkar India katkum ka artikil 32 ka riti synshar ka ri, pyrshah ia ka jingpyntreikam ka sorkar India ia kane ka ain.
Ki nongialam ka NESO kynthup u chairman bah Samuel Jyrwa bad kiwei nalor ki nongialam ka KSU bah Lambokstarwell Marngar, kila her sha Delhi mynta ka sngi, ban leit sngap ia kane ka jingbishar ka Supreme Court halor kane ka ain, kaba la wanrah ia ka jingiakhih kylleng ka ri.
Katkum ka CAA, ki Hindu, Parsi, Jain, Buddhist bad Khristan kiba sah ha Afghanistan, Pakistan bad Bangladesh kiba wan sha India shwa ka 31 tarik Nohprah 2014, kin lah ban kam nongshong shnong ka India hadien bala pynbiang ia ki jingdonkam.
Ha ka jingpyllait ka sorkar India dang shen ia ka rule jong ka CAA, ka la pyllait noh ia ki jaka ba hap ha ka Sixth Schedule bad kiba hap ha ka jingtreikam ka Inner Line Permit ha kane ka thain shatei lammihngi ka India.