SHILLONG:Ka Election Commission jong ka ri India (ECI) ka la pynbna ia ka tarik na ka bynta ka election MP sha Lok Sabha, bad ha kane ka election na ka bynta 543 tylli ki constituency ka jingthep vote kan don haduh Hynniew kylla ( lane 7 phase) ka ban sdang naduh ka 19 tarik Ïaïong haduh 1 tarik Jylliew hapoh ka ri India baroh kawei, bad ka jingniew ia ki vote kan long ha ka 4 tarik u bnai Jylliew.
U Chief Election Commissioner ka ri India, u Rajiv Kumar u la iathuh ba ka jingthep vote ha ka phase ba nyngkong kan long ha ka 19 tarik Ïaïong, bad ha kane ka sngi 21 tylli ki Jylla kin thep vote kynthup ha Meghalaya, ka phase ba ar kan long ha ka 26 tarik Ïaïong, ka phase ba lai kan long ha ka 7 tarik Jymmang, ka phase ba saw ha ka 13 tarik Jymmang, ka phase ba san ha ka 20 tarik Jymmang, ka phase ba hynriew kan long ha ka 25 tarik Jymmang, bad ka phase ba Hynniew kan long ha ka 1 tarik Jylliew, bad ka jingniew ia ki vote kan long ha ka 4 tarik u Jylliew 2024.
U CEC u la iathuh ruh ba ha kane ka election kin don haduh kumba 96.8 klur ngut ki nongthep vote, kynthup 49.7 klur ki shynrang bad 47.1 klur ki kynthei katba 1.82 klur ngut ki samla ba dang ioh thep vote ha ka sien ba nyngkong, bad yn don haduh 55 lak tylli ki EVM na ka bynta 10.5 lak tylli ki polling station ha kane ka election.
U CEC u la kyntu ruh ia baroh ki nongialap election ba kim dei ban kynthoh shimet iano iano ha ka por ba ialap election bad la mana ruh ban pyndonkam ia ki khynnah ban ialap election.