SHILLONG: Katkum ka tnad ialehkai ka jylla ki don 14, 500 ngut ki nongialehkai ha ka jylla kiba la wan ban shah test ia la ki sap jongki ha ka Talent Identification Program jong ka sorkar jylla. Tang mynta ka sngi, ki don 500 ngut eiei kiba la shah khot ban iadon bynta ha ka prokram kaba la pyllong ha madan ka North Eastern Hill University (NEHU), Shillong.
Ka sorkar jylla ka la pyntreikam ia ka Talent Identification Program bad ka Elite Pathway Program (EPP), hapoh ka STAR Program, ryngkat ka jingiatreilang bad ka Meghalaya State Olympic Association (MSOA).
Lyngba ka EPP, kumba 200 ngut ki nongialehkai athlete kila shah hikai bad ha u 2024-25, palat 10,000 ki nongiashim bynta kynthup kiba naduh 6 snem kila wan ban shah wad ne ïit ia ka sap ba ki don.
Ha kane ka sngi, la sam ruh ia ka jingai mynsiem da ka pisa sha ki nongialehkai kiba wanrah takma ksiar. Ki 297 ngut ki nongialehkai Athlete bad ki Coach kila ioh pdiang ia ka pisa kaba T. 68 Lak. La sam ruh ia ka khusnam ialehkai sha ki nongialehkai ha kane ka snem.
La sam khusnam ruh ia ki nongjop ha ka jingiakop tem jong ka 7th North East Youth Festival. Ha kane ka prokram la don lang u myntri rangbah ka jylla u Conrad K Sangma, u Chief Secretary bah D.P. Wahlang (IAS), bad ka Director ka Sports and Youth Affairs, kong Isawanda Laloo (IAS) bad u bah John F. Kharshiing, u working President, MSOA.
U Co-Owner ka North East United F.C. (NEUFC) uba dei ruh u tyngshop ka Bollywood, u John Abraham ruh u la don lang ha kane ka prokam nalor ki nongialehkai.
La pynbna ruh ia ka jingiateh soskular hapdeng ka NEUFC bad ka tnad ialehkai ka jylla ban kyntiew ia ka jingialehkai kynjatbol ha Meghalaya. Ka jaka na bynta kane yn ai sha ka NEUFC ha Mawkhanu, East Khasi Hills ba kan shna ia ka madan kaba biang lut nadong shadong kum ka Residential Football Academy.
Wan shah test sap 14 hajar tam ki nongialehkai ha jylla
