SHILLONG: U Chief Executive Member ka KHADC u bah Pyniaid Sing Syiem ula kyntu ia ki samla trai muluk, ba kim dei ban sngew shongshit ban ieid jaitbynriew tang ha ki social media ne tang da ka sla ktien, hynrei ki dei ban mih sha madan ban seng kam ban trei, bad ka Council kan kyrshan ia ki, khamtam ha khappud.
Haba jubab ia ka jingiatai hapoh ka dorbar mang tyngka ka Council mynta ka sngi halor ka mat kaba la wanrah u nongialam liangpyrshah bah Titosstarwell Chyne ia ka jingeh ki paidbah, u bah Pyniaid ula kyntu ia ki samla ban leit sha thain khappud ban seng kam khnang ban khang lad na ka jingshah klun ha kiwei ki jaitbynriew.
Ula ong ba ka KHADC kan leit iakren ruh bad ka sorkar jylla ban pyndam noh ia ka jingpynbna kaba la pynmih ha ka por ba long myntri rangbah u Dr. Mukul Sangma kaba ailad ia ki kompeni ban wan seng kam khlem ioh shwa ia ka jingbit na ka Council.
Kumjuh ula ong ba ka KHADC kala thoh sha tnad Transport ban ym ai license ia ki kaki niah kali kamai ki bym dei trai muluk khlem trading license na KHADC.
Kiwei ki lad ba ka Council kala shim ban ai kam ia ki samla ka long lyngba ka kam jngohkai pyrthei na ka spah lariti.
U CEM ula kular rug ban shim khia halor ka jingeh ki nongrep na ka jingtad dor u synsar bad kumjuh kiwei ki mar rep. Ula ong ba ka Council kan shim khia ruh ban tehlakam ia ka jingwan ki briew nabar ban thied ia ki mar rep na lyngkha khlem ka trading license, bad kaba lah ban buh jingma ia ki kynthei khynnah ban shah rahbor ha kum kitei ki briew.
Ula pynthikna ruh ban iakren bad ka sorkar jylla ban thaw lad ban ai lad ia ki briew ban tih maw tih shyiap da ka rukom barim da kaba pyndonkam tang da u mohkhiew bad lyngka khlem ka bor mashin.
Ki samla kim dei ban ieid jaitbynriew tang ha social media, mih ban seng kam, ka KHADC kan kyrshan: CEM KHADC
