SHILLONG: U Myntri Rangbah ka jylla u Conrad K Sangma u la ong ba ka sorkar kan ym iaid lait na ka mon jong u paidbah ha kaba iadei bad ka jingtih ia u uranium ha ka jylla.
Haba kren mynta ka sngi sha ki lad pathai khubor, u Conrad u la ong ba mano mano ki lah ban thoh sha ka sorkar India hynrei kata kam dei satia ka rai jong ka sorkar jylla ha kaba iadei bad ka jingtih ia u uranium.
“Kano kano ka seng ka lah ban thoh, ngam lah ban pynsangeh hynrei kata kam dei ka rai ka sorkar”, la ong u Myntri Rangbah.
“Ngi kren shai ba khlem ka mon jong u paidbah, khlem bishar ia ka jingstad saian, ngim ym shah ban tih ia u uranium ha ka jylla Meghalaya. Ka dei kaba iadei bad ka jingim jong ki briew, ka jingkoit jingkhiah jong ki briew, bad kaba iadei bad ka lawei ka jylla”, la ong u Conrad.
U la ong ba haduh mynta kam don satia kano kano ka jingthoh na ka sorkar pdeng halor kane ka kam.
Ka sorkar kam lah ban iaid lait na ka mon ki paidbah halor u Uranium, ong u Conrad
