SHILLONG: Ka Riwar Mihngi Football Association ka la pynlong ia ka jingiajied ia ki nongkitkam kiba pura jong ka samoi treikam 2024-27 da ka elekshon ha ka 9 tarik Lber ha Ing Durbar shnong ka Urksew Wahpathaw ha ka por 11.00 am.
Ia ka Elekshon la pyniaid ka Election Committee jong ka Riwar Mihngi Football Association bala ialam da u bah Wanhun Massar kum u chairman ryngkat u bah Summit Massar, kiba la ju long teng ki nongialam ha ka imlang sahlang jong kane ka thain Riwar Mihngi.
La wan iashim bynta baroh 16 (Khathynriew) tylli ki Sports Club, Football club kiba la pyniasnoh bad ka Association. La sakhi ia katei ka jingiajied nongkitkam da ki pyrman (Observer) na ka Meghalaya Football Association kiba Kynthup ia u Bah Sunesh Syiem bad u bah Dipshon Ryntathiang kiba la wan ban sakhi lang bad ban pynshisha ruh ba katei ka kam ka long kaba bit ba biang bad iaid beit iaid ryntih katkum ki kyndon treikam ka Meghalaya Football Association.
La ioh ban jied bad pynskhem ia kine ki nongkitkam jong ka samoi treikam 2024-27:-
1. President: Bah Iengskhem Diengdoh
2. Vice President: Bah Largest Laso
3. General Secretary: Bah A. Dapborlang Kharbudon
4. Asst. General Secretary: Bah Kitdor Khongsdam
5. Finance Secretary: Bah Aimusing Khongjee
La aiti ha kitei ki nongialam ba kin pyndep ban thaw ia ka Executive Committee kiba iadei dur bad ka riti treikam bad ruh ba ki dkhot kin iadonbynta lang na baroh ki bynta ka Riwar Mihngi.
Hadien ka jingiajied, la ioh shibun ki jingkren kyntu kynpham na ki nongialam ka Meghalaya Football Association bad ki kyntien khublei na u President jong ka Association sha baroh. Ula pyntip ruh ba ka jingialehkai phainal jong Senior Men league 2023 kan long ha ka 16 tarik Lber 2024 ha ka por 2.00pm ha UUP Stadium Urksew, Pynursla, ha kaba ka Pynursla United Youth Club kan iakhun pyrshah ia ka Lapalang Sports club.
Ioh nongkitkam ka RMFA, 16 tarik yn iaknieh lahduh ka Pynursla United Youth Club pyrshah ia ka Lapalang Sports Club
