SHILLONG: U MLA ka Nongkrem u bah Ardent Miller Basaiawmoit u la maham ia ka sorkar jylla ba ka jingjubor ka jingshim ram kan buh ka jingma ia ka jylla.
Haba shim bynta ha ka jingiatai halor ka mang tyngka 20224-25 hapoh ka iing dorbar mynta ka 23 tarik Rymphang2024, u bah Ardent u la ong ba ka kaiphod u CAG 2021-22, u la kdew b aka ram ka jylla ka la nang kiew 62.2 percent bad kane ka buh ia ka jylla ha ka jingsyier namar ba kam dei kaba lah ban kyrshan nalade.
Ka ram kaba shim ka sorkar jylla na kiwei ki tnad lait noh na ka sorkar India, ka la kot sha ka T.13,000 klur tam jong ka snem 2023-24, katba ka siew tang T.2156 klur bad ha kane ka mang tyngka ka ram ka long T.15524 klur bad ka siew T.2736 klur bad kane ka dei ka jingkdew ka kaiphod u CAG haba u pule ia ka mang tyngka ka sorkar jylla.
U la kyntu ia ka sorkar ba lada kam lah ban pynbeit ia kane, ka jylla kan kynduh mawsiang ha ki sngi ban wan. Ula ong ba man ka snem ka sorkar ka thied kali ia ki heh ki ophisar, ki myntri sorkar bad hato kane ka donkam ban thied man u snem. Ula buh jingkylli ruh kumno ka sorkar kan pyllong ia ki tamasa, bad ha ka jingshisha, ka dei ban aiti ha ki kynhun bym dei sorkar ban ioh khajna ka sorkar.