SHILLONG:U Myntri Rangbah ka Jylla, u Conrad Kongal Sangma u la ong ba ka tnat Kam Pohïing (Home Police) jong ka Sorkar ka la trei tyngeh bha ha ki khyndiat snem ba la dep ban khanglad ia ka jingpynpoi ia u drug sha kane ka Jylla.
Haba jubab halor ka jingiatai ia ka jingkren u Lat hapoh ïingdorbar, u Myntri Rangbah u la pyntip ba haduh mynta, palat 1600 ngut ki briew kiba la shah kem bad la mudui haduh 882 ki case, bad na kine 696 tylli ki jingmudui la chargesheet.
U la iathuh ruh ba la ioh ban kurup ruh bun bah u drug la ioh kem ha kine ki khyndiat snem, bad pyntip ba kumba 40,000 gram u drug heroin la ioh, kumba 11,000 kilo u ganja, bad kumba 2700 gram u drug opium, bad kiwei kiwei ki dawai. Shuh shuh u la pyntip ba ka tnat pulit ka la ioh ban kurup ruh ia ka pisa ba la jan kot T.1 klur, ki mobile phone, bad 323 tylli ki kali.
U Conrad u la ong ba watla ka Sorkar ka la iakhun, hynrei ka long shisha kaba eh namar ka jingbun palat kiba bteng ban khaïi namar ba kadei kaba ki iohnong bha ka pisa, bad don ki por ba ki pulit ki iakynduh jingeh bha ha kane ka jingiakhun, hynrei u la bynrap ba ka Sorkar kan leh ia kaba bha tam ha kaba iadei bad kane ka mat, ban punkut syndon ia ka jingwan tuid jong u drug.
U Myntri Rangbah u la ong ba ka Sorkar ym tang ba ka iakhun ban khang ia ka jingwantuid jong u drug, hynrei ban pyllait ruh ia kiba la kyrni da kaba buh ia ki jaka iasyllok, bad pyntip ba ka Sorkar ka la pyntreikam ruh ia ka Drug Reduction Elemination and Action Mission (DREAM).