SHILLONG: U myntri rangbah ka jylla u Conrad K Sangma ula pyntip mynta ka sngi hapoh ka iing dorbar thawain ba la phah 8 tylli ki shithi sha ka sorkar India halor ban dawa ithuh noh ia ka ktien Khasi bad Garo.
U la ong ba la ioh pdiang 2 tylli ki shithi na ka tnad kam pohiing ka sorkar India. Ula pyntip ba kam don satia kano kano ka kyndon kaba batai shai ban ithuh ia ki ktien ha ka khyrnit ba phra ka riti synshar ka ri.
Ia ka jingkylli la wanrah u MLA ka Mawryngkneng bah Heavingsong Kharpran.
U Conrad ula ong ba ka jingphah lang ia ka ktien Khasi bad Garo ban ithuh ne pynrung ha ka khyrnit ba phra, kam don kano kano ka jingkhang bad ka shong ha ka rai ka sorkar India ban ithuh ia kiba biang katkum ki kyndon.
Ula ong ba ka sorkar Assam ruh kala phah ar tylli ki ktien, ka ktien Bodo bad ka ktien Karbi hynrei ka sorkar India kala pdiang tang ia ka ktien Bodo ha katei ka por.
Ula ong ba dei ka sorkar MDA1, kaba la shim khia ia kane ka kam da kaba shim syndon da ka rai hapoh ka iing dorbar ha 2019.
Man ba don ka jingialang ha Delhi, la iakren ka kane.
La dep phah jingthoh 8 sien sha ka sorkar India hynrei khlem pat rung ka ktien Khasi bad Garo
