SHILLONG:Ka HYC Sohiong Zone ha poh jingïalam u President Samla Purningstar Shabong bad u General Secretary Samla Wesmandar Lyngdoh Lyngkhoi ha ka 14/2/2024 kala leit ban jurip kynsan ïa ka CHC Sohiong. Ka jing leit jurip ba jong ka Seng ka dei halor ka jing ud jing nam bad ka jing ujor jong kiba paidbah na ki por sha ki por halor ka jing bym biang ha ka rukom sumar jong ka tei ka CHC.
Ka Seng ha kane ka sngi ka la lap ba ym don wat tang iwei ruh i Doctor ha kane ka CHC bad ki don tang ki katto katne ngut ki nongtrei. Na ka liang ki nongtrei kila thok ba i Doctor i dang bam sha kamra. Hynrei kham hadien kila pyntip ba i doctor im don ha CHC bad i dang leit donkam.
Kaba pynlyngngoh ïa ka Seng ka long ym don satia wat tang iwei ruh i ban thiah sumar ha kane ka CHC bad ka CHC ka kynjah slam slam kum ka ïng jah.
Kham hadien, mar syn wan i doctor i la wan bad kren beit da ka jing dom bad la shu ïakren ha phyllaw ka CHC, ym shym la khot ïakren wat tang ha kamra ruh.
Na ka liang u President, Bah Purningstar Shabong ula pynpaw ïa ka jing bynñiaw halor ka jinglong jingman jong kane ka CHC bad ula ong ba ki paidbah kila duh noh ka jing shaniah ïa ka tei ka CHC kumba ka paw ba ym don nong phah sumar ha kane ka CHC.
Ula ong ruh, ba ki paidbah jong ka dong ka thaiñ ki hap ban leit phah sumar sha CHC Mawphlang haba ki don ha ka pang ka shithom namar ba ka CHC Sohiong kam lah ban ai ka jingshakri kaba dei ban ai.
Dei na ka jinglong jong ki nongtrei kaba kumne lehse, kaba la pynduh jingshaniah noh ïa ki paidbah jong ka dong ka thaiñ ïa ka tei ka CHC ha kaba i doctor haba ïakren i kren da ka jingdom.
U la ong ruh, kam mut ba baroh ki nongtrei jong ka CHC kim don ka jingkit khlieh. Hynrei ki don ki Nurse kiba ka Seng ka lap kibatrei sha ki Sub-Centre kiba hap ha poh ka jingpeit jong kane ka CHC kiba trei shitom bha. Hynrei kiba trei ha CHC kila duh noh ka jingshaniah na ki paidbah.
Ula ong ruh ba lada ka jing don jong ka CHC Sohiong kam shym la ai jingmyntoi ïa ki paidbah jong ka thaiñ, bad ka jingdon jong kane ka CHC ka long tang ban pynlut kai ïa ka pisa jong u paidbah, kam don jingmut ban don ïa kane ka CHC.
Ula kyntu ïa ka sorkar Meghalaya ba ka dei ban pynbiang ïa ki Doctor, ki Nurse bad ki jing donkam baroh ha ka tei la CHC kumba ka leh ha kiwei mi CHC bad lada na ka liang jong ka Sorkar kam lah ban pynbiang, na ka liang ka Seng kan hap ban wan khang tala noh ïa kane ka CHC ha kano ma ka sngi.