SHILLONG: Uwei u ophisar jong ka tnat Veterinary and Animal Husbandry V&AH kaba don ha Muktapur, Amlarem Block, u la kynnoh ba u la shah leh tohmet ha ki shipai BSF hynne ka sngi u Blei ka 11 tarik Rymphang, bad namar kane ka jingleh dobor jong ki BSF ka la pynbitar ia ki paidbah nongshong shnong.
Katkum ka jingiathuh utei u ophisar, la ong ba ki BSF ki la tohkit ia u katba u dang thmu ban leit khwai doh, hynrei hadien ba u la pynphai nia ia ka jingtohkit jong ki bad ring video da ka mobile phone ki la knieh syndon ia ka mobile bad patan ia u bad phah loit lyngkhuit da kaba byrngem ban siat iap ruh ha zero point jong ka khappud India-Bangladesh.
Katkum ki video ba la saphriang lyngba ka WhatsApp, utei u rangbah u la iathuh ba ki don 2 ngut ki BSF kiba la leh tohmet ia u, bad kitei ki BSF ki la phah panmap ruh na u da kaba u hap ban nguh haduh ki kjat jong ki, hynrei u la kyntait ban leh ia kata kaba la pynlong ia kita ki BSF ban bitar, bad iathuh ruh ba ar ngut ki longkmie kiba iohi ia katei ka jingleh ki BSF ki la leit ban tuklar bad pyllait ia u na ka jingleh donbor jong kitei ki BSF.