SHILLONG: Ka kyrtong MP ka NPP na Shillong Parliamentary konstitwensi ka kong Ampareen Lyngdoh ka la ong ba kam donkam sertiphiket na ki nonghylla ha social media kiba khlem khmut khlem khmat kiba shu kynnoh kynthah.
Haba kren ha ka jingialang ha Umsaw ka Sohiong konstitwensi mynta ka 7 tarik Rymphang 2024, ka kong Ampareen ka la ong ba ai ba kin iakren katba ki mon ha social media hynrei kan iaid ha la ka lynti bad ka ong ba lada ki don jingeh eiei ki dei ban mih shakhmat ban iatyrko ryngkat ka kyrteng ka dur ba shisha.
Ka la ong baroh ki sngew tynnad bha ban kynthoh ia ka hynrei kita baroh kin nang pynioh bor nang ai buit shuh shuh ia ka.
Ka la ong ba ka jingkynnoh ia ka NPP ba ka dei kaba kumta kumne ka dei tang ban ialam bakla ia u paidbah hynrei kan trei shitom ban iohi ba ka NPP kan mih pli kum ka APHLC ban pyniatylli ia ka jylla.
Ha kane ka sngi, ka kong Ampareen kala iakynduh iaki nongialam ba hakhmat eh ka NPP jong ka Sohiong Block, shi bynta ban pynkhreh ia ka elekshjon MP sha ka Lok Sabha na Shillong Parliamentary konstitwensi, ha ka jingdon lang ki nongialam ka NPP, bad ia ka jingialang la pyniaid u bah Rudson Warjri u President ka NPP Sohiong Block.
Ym donkam sertiphiket na kiba khlem khmut khlem khmat ba shu kynthoh pathar, ong kong Ampareen
