SHILLONG: Ka MLA jong ka East Shillong, ka Dr M Ampareen Lyngdoh ka la ong ba ki nongshong dukan ha ki rud surok ki don ia la ka jong ka hok, hynrei hap pat ban pynkynriah ia ki namar tang shu sdang ki skul kan sa wanrah jingeh shibun na ka jingbteng ban kharoi ki nongshong die dukan ha ki rud surok ha ka thain Laitumkhrah.
Ki nongshong shnong ka Laitumkhrah ha ka thain Veronica Lane dang shen ki la pynpaw ka jingpyrshah jur ia ka jingthmu jong ka Sorkar ban pynkynriah ia ki nongshong dukan rud surok sha Veronica Lane, da kaba kynnoh ba ia katei ka rai la shim khlem da iasyllok ia ki nongshong shnong.a
Haba kren mynta ka sngi, ka MLA kaba dei ruh ka Myntri ha ka Sorkar ka la ong ba ka la ioh ban iakynduh ia ka kynhun ki nongshong shnong ha Veronica Lane, ha kaba ka la ong ba kam lah ban long ba baroh kin don kajuh rukom pyrkhat, bad ka la kyntu ia baroh ba da long kumno kumno ruh donkam ban weng ia kane ka jingeh, bad ka la pynpaw ka jingkyrmen ba yn lah ban pynbeit ia ki jingbym sngewthuh da ka jingiakren, namar baroh kiba iaid lyngba bad kiba leit sha Laitumkhrah ki iakynduh jingeh namar ka jingkharoi kiba shong die madan.
Ka Dr Ampareen ka la ong ba hap beit ban don la kajong ka jaka shong die dukan madan, bad ia kane ym dei ba ong ka MLA, hynrei dei ka ain kaba kdew, bad kam donkam ban pynshit iano iano ban kynthoh ia ka Kong Ampareen.