SHILLONG: Mynta ka sngi Palei jong ka taiew, na ka liang jong ka tnat Directorate of Sports & Youth Affairs ryngkat ka Meghalaya Football Association bad kumjuh ka Meghalaya State Olympic Association, ki la pdiang burom ia ka kynhun ki samla ialehkai Phutbol ka jylla, kaba hynnin ka sngi Balang jong ka taiew, ki la ioh ba kiun khur syndo9n da ka takma ksiar, ha ka jingiakhun ia ka phainal jong ka lympung ialehkai ka Khelo India Youth Games kaba la long ha Chennai.
Kumban shu pynkynmaw ba ka Meghalaya hapoh ka jingialam jong u bah Jeffrey Warlarpih kum u coach kila lah ban pynliem noh ia ka Punjab da 2-0 bad ia kine baroh artylli ki kol la thep ia ki da u badondor Marbaniang ha baroh ki ar kylla jong kane ka jingiakhun.
Ka jingpdiang burom ia kane ka kynhun ka la sdang naduh ka kad liengsuin na Guwahati ha kaba u District Sports Officer jong ka Ri-Bhoi District u la leit ban pdiang bad shaw ia kane ka kynhun na kane ka jaka, bad hadien kane na ka liang ka tnat Sports ka la pynbiang da kawei ka kali heh kiaba la pynriam pynbeit bha ia ka bad ban pynkiew pat ia ki player baroh ha kane ka kali.
Nangne la pynloong ia ka jingiald lynti ha ki kato katne ki bynta jong ki surok ba pawnam ka nongbah ha shwa ba ia kane ka kynhun yn da pdiang burom biang ia ki sa shisien ha madan MFA Turf Third Ground, Polo.
Ha kane ka jingpdiang burom la wan ban ia sakhi lang da kongsan kong Isawanda Laloo (IAS) ba dei arta dka Director jong ka tnat Sorts & Youth Affiars, la iadon lang ruh u Working President bad Secretary ka Meghalaya State Olympic Association u bah John. F. Kharshiing bad u bah Finely L. Pariat, u President bad Secretary ka MFA u bah Hamletson Dohling, bah Sunesh Syiem bad ki dkhot nongkit kam ka MFA.
Nalor katta la ia don lang ruh arngut ki player ialehkai Phutbol ba la paw bad ba kynsai ka jylla kum u bah Ailad Kynta bad u Phrangki Buam.
Haba kren kum ka kongsan I kong Isawanda Laloo I sngew ban ainam ai burom ia kane ka kynhun kum kita ki khlur jong ka ri halor ka jinglah jong kane ka kynhun ban wanrah ia ka nam ka burom ryngkat bad ka trophy kaba long da shisha kaba da pynsngew sarong bha ia ka jylla hi baroh kawei.
Shuh shuh I la batai sha ki player ba balei ba na ka liang ka jong I kum ka khlieh jong ka tnat Sports ba kan da leh burom haduh katne, ka daw hi ka long ba I da kwah ban ai mynsiem bad ai lem ia ka nuksa sha kiwei pat ba lyngba ka jingtrei shitom la lah pat ban wanrah iaka nam sha ka jylla.
Katba na ka liang u bah Hamletson Dohling u la ieng ban pynkynmaw ba ha ka 16 tarik mynta u bnai uba la dep ha ka jingialang kitbok ia kane ka kynhun u pynpaw ba ka MFA ka dap beit da ka jingkyrmen ba khlem pep kane ka kynhun ka I don bha ka jingkyrmen kaba da kylla kane ka jingkhmih lynti kam shym la long kaba lehnohei.
Ha kane ka jingialang la wan ban sakhi lang ruh da ki kmie ki kpa bad ki bahaiing ha sem jong ki player ba la mih khmat sha kane ka lympung.
Nalor katta kum ka kynhun ka la shim ruh ia ka kabu ba kan aiti ia ka trophy kaba ki la ioh ban diangti na kane ka lympung ha I kong Isawanda Laloo bad ba ka la don ruh ka jingsam ia ki song ai sngewbha sha ki player u coach bad kumjuh sha ki nongiarap jong kane ka kynhun.