SHILLONG: U Director ka NEIGRIHMS u Prof. (Dr) Nalin Mehta mynta ka 31 tarik Kyllalyngkot 2024, ula wan mareh sha phyllaw ka NEIGRIHMS ban pan mab na ki nongialam ka seng Hynniewtrep Youth Council – HYC hadien ba u la kum kren dait ia ki ha kamra ha ka por ba ki leit ban iakren ia ki kam ha katei ka hospital.
Ha ka jingshisha, ki nongialam ka HYC kila leit sha NEIGRIHMS hadien ka jingkhot jong u Director ban iakren ia ki mat jingdawa ba ka Seng.
Hynrei hadien ba shah kren dait, ka HYC ka la mih jyndat noh na kamra jong u bad ka jingbyrngem ban khang tala shisyndon ia katei ka hospital.
Ki Majistor kiba la poi sha katei ka jaka ki la tuklar ban iakren ia u Director haduh ba un wan sha phyllaw bad pan mab na ki Nongialam ka HYC bad kyrpad ba kin klet noh ia ki jingbakla jong u. U la khot biang ruh ia ki ba kin wan sha ka jingiakren halor ki mat dawa ba ka seng ka la buh.
Watla u Director ula khot biang ban iakren halor ki mat jingdawa, hynrei ki nongialam ka HYC kila kyrngah bad phah pynbeit ia u da kawei pat ka sngi ban iakynduh bad iakren bha ia kiei kiei baroh.
U President ka HYC u Bah Roykupar Synrem ula pyntip ba ki jingdawa jong ka seng na u heh ka NEIGRIHMS ki kynthup ia ka jingthung kam ia ki nurse kaba la pyniaid mynta lyngba ka Nursing Officer Recruitment Common Eligibility Test (NORCET) kaba pynduhlad ia ki nurse trai Jylla ban iohkam ha NEIGRIHMS, ka jingaiwai ia ki kam (outsource), ka jingthungkam ba 80% ia ki trai muluk ha ka Group B bad C, ban thungkam pura noh ia ki nurse kiba dang trei contract bad kiwei kiwei.