SHILLONG: Ka myntri ka tnad ka koit ka khiah ka jylla ka kong Ampareen Lyngdoh ka la kyntait ia ka jingdawa ki nongtrei ban shimti ban pyniaid ia ka EMRI 108 namar ba kam long kaba dei ban leh kumta.
Haba kren mynta ka 29 tarik Kyllalyngkot 2024, ka kong Ampareen ka la ong ba watla ka sorkar kan shimti ban pyniaid, hynrei kan pynthikna ba ki nongtrei kin ym shah leh bein ha ka kompeni kaban shimti ban pyniaid.
Ka la ong ba ka sorkar kan pynkloi noh ban khot tender ia ki kompeni ban shimti ban pyniaid ia ka EMRI 108.
Ki nongtrei ka EMRI 108, kila iakynduh ia ka mynta ka sngi, bad kila aiti ruh ia ki mat kiba donkam khamtam ha kaba iadei bad ka jingsiew, ka jingshngain ha kam bad kiwei ki jingmyntoi. Kila dawa ka la dei ban shimti noh ka sorkar ban pyniaid ia ka 108 da kaba thaw lyngba ka Society, namar ba ka jingpyniaid ki kompeni kan ym long kaba shngain.
Ym long ban pyniaid ka sorkar ia ka EMRI 108, ong kong Ampareen
