SHILLONG: Ka Khasi Students’ Union (KSU) South East Central Circle, Pynursla, ka la ioh biang ban pynthymmai ia ki nongkitkam ba thymmai ha ka 27tarik, Kyllalyngkot 2024 na bynta ka samoi treikam jong u snem 2024-27 daka jing ia thep vote la panbit pynbiang bad la pyniaid hi da ka Election Committee jong ka KSU-CEC kata; da ka jingiathep vote ha kaba u Samla Cleenstar Shabong, u Secretary jong ka Committe bad uba long ruh ha kajuh ka por u Assistant Organising Secretary ka KSU-CEC u la long u Nongpyniaid bad nongkhmih bniah ia ka jingiaid ryntih kane ka jingjied Nongkitkam.
Ha kane ka sngi ki dkhot ka KSU South East Central Circle, Pynursla na ki 8 tylli ki Unit ki la jied bad pynkhamti ha kine harum ban long ki Nongialam ba thymmai jong kane ka Circle:-
1. President: Samla Wallam Jingshngaiñ Suting
2. Vice- President Samla Basuklang N Khongwar
3. General Secretary: Samla Vorrozislov Sohklet
4. Assistant General Secretary: Samla Sanlang Vennhanan Diengdoh
5. Organising Secretary: Samla Jestice Kharbyngar
6. Education Secretary: Samla Riskhemlang Lyngdoh
7. Sports Secretary: Samla Mewanteiskhem Mawïong
8. Environment and Cultural Secretary: Samla Thawthymmai Suting
9. Office Secretary: Samla Pynskhemborlang Nongrum
10. Publicity and Information Secretary: Samla Pynkiewbiang
Ha kane ka sngi hadien ba la dep pynbna ia ka result jong kane ka election la pyndep ruh ia ka jingshim jingkular ia kine ki Nongkitkam ba thymmai jong ka Circle da u Samla Raymond Kharjana, Chairman ka Election Committee bad uba long ruh u Organising Secretary ka KSU-CEC. Ha kane ka sngi la ioh ia ka jingkren ba lyngkot na u Samla Raymond Kharjana ha kaba u la pynkynmaw ia ki Samla ba haba ki long kum ki nongialam ne dkhot jong ka Seng, kim dei ban khmih lynti jingmyntoi na ka Seng naba ka Seng hi kam ju ioh eiei ban ai ne siew tulop ia ki kumba long kiwei kiwei pat ki nongtrei ia kiwei kiwei ki kam. Hynrei ka KSU don tang ban ai ia ki jinghikai ia ki Samla bad ki paradoh para snam kumno ban ieid iala ka ri ka Jaidbynriew bad ban pynshlur ruh iaki samla ba kin long kiba trei shitom khamtam eh haba ki ialeh ia kino kino ki mat ba ka Seng ka shim ban ialeh. Shuh shuh une u Samla ula ong ruh ba ha kine ki sngi kum ki dkhot ka Seng ngi dei ban long kiba peit ngor bad kiba husiar bha ia ka jingkren bad jingkynshoit ki katto katne ngut kiba pyrshang ban pynpait pynpra ia ka Jaidbynriew halor ka nongrim jong ka jingsngew pher thaiñ, jingsngew pher niam bad ka jingpyniapher Jaidbynriew halor ka ktien ka thylliej ba ngi kren ha ki shnong bad ki dong bapher bapher jong ka Ri-Hynñiewtrep.
La ioh ruh ia ka jingkren ha kane ka sngi na u Samla Melajied Khongbuh, Assistant Publicity & Information Secretary KSU-CEC bad uba long ruh u nongpeit nongkhmih ia ka Seng ha kane ka thaiñ. Une u Samla u la ong ba kum ki nongialam ba thymmai ka Circle ki dei ban long kiba kloi ban bah ia ka lyngkor ba khia na ka bynta u paidbah paidlang jong kane ka dong ka thaiñ bad ba kin iai pyntyllun shakhmat ruh ia ki shalyntem jong ka Seng da kaba pyndep ia ki kam ba dang basah ha ka samoi treikam jong ki nongialam barim jong ka Seng.
Shuh shuh u Samla Ksanborlang Thabah, u General Secretary barim jong ka KSU haba ai jingkren ha kane ka sngi u la ai khublei kyrpang ia ki dkhot jong ka Seng kiba na ki 8 tylli ki Unit kiba hap hapoh kane ka Circle kiba la shimkhia ban pyndep ia la ka jong ka kamram da kaba ia poi ryntih ban jied ia ki nongialam kane ka Circle. Kyntang ia wai u la ai ka jingkyrkhu kitbok kit rwiang ia ki Nongialam ba thymmai ka Circle ba kin nangiai lah ban trei kham bha shuh shuh lyngba ka KSU na ka bynta ka bit ka biang bad ka shongsuk shongshngaiñ jong ki paradoh para snam kiba don ha kane ka thaiñ.
La ioh ruh ia ka jingkren lyngkot na u Samla Wallamjingshngaiñ Suting, President ba thymmai jong kane ka Circle, uba la ong ba um don eiei ban kren kum u President ba dang shu shimti ia ka kam Nongialam. Hynrei u la kyrpad ia baroh ki Nongkitkam ba thymmai bad ia ki dkhot ka Seng ba kin ia snohkti lang kawei ban ia treilang ryngkat bad u kum u President khnang ba kin lah ban pyntyllun shakhmat ia ki shalyntem jong ka Seng. Shuh-shuh u la ong ruh ba um don shibun ban kren, hynrei u don ban ong tang kawei ba ai ba ka jingkren nangne shakhmat kan dei beit da ka kam, ym shuh tang da ka ktien.
Ha kane ka sngi la pyniaid ia kane ka jingialang ba lyngkot jong ka Lympung pyntian smai ia kine Nongkitkam ba thymmai da u Samla Cleenstar Shabong, Secretary Election Committee KSU-CEC ha ryngkat ka jingiadon ryngkat ki dkhot ka KSU napoh Shillong kiba la wan ban ai mynsiem bad ban pynshngaiñ lang ha kane ka Lympung ong ka kyrwoh na u Samla Pynkiewbiang Khonglein, Publicity & Information Secretary ka KSU South East Central Circle, Pynursla.