MAW-AH: Kawei na ki jaka jngohkai pyrthei kaba la mih thymmai ka dei ha shnong Maw-ah kaba don ha Raid Wahkhen, kaba don ki Maw bah ryngkat ka khanatang halor jongki.
Kine ki Maw la khot kyrteng kum u Mawsohlah uba don ki khmat hati bad u Mawrngiang.
Katkum ka khana hyndai, u Mawsohlah u dei kum u Lyngdoh katba u Mawrngiang u dei u myntri, kiba wan ban sakhi na ka Hima Khyrim ha ka jingialeh thma pyrshah ia ka Hima Sohra.
Ka Mawrngiang Mawsohlah Tourism Trekking Cooperative Society, Maw-ah dang mynshem snem kala shim ia ka sienjam ban pynbha ia kane ka jaka kum ka jaka jngohkai, na bynta ban kyntiew ia ka ioh ka kot jong ki nongshong shnong.
Namar ba kane ka shnong kam pat poi surok, hap ban iaid kjat kumba 45 minit eiei ban poi sha katei ka jaka, ka lynti ka bym da eh than ban iaid wat ia kiba heh kpoh, ne ki bym ju mlien ban iaid ruh namar ba ka long madan.
Haba iathuh halor kane ka kam, u Vice president ka Society u bah Minun Khongleiñ, ula ong ba la sdang ia kane ka kam hadien ba la lum ia kumba 20 ngut eiei ki nongshong shnong mynshem snem bad mynta u snem la kiew ka jingdon ki dkhot sha ka 30 ngut tam eiei. Kila mih shisien shi taiew ban iatrei mon sngewbha ban shna ia ka lynti, ia ki jingker ha katei ka jaka, namar ba kim pat ioh jingmih eiei.
Ha kajuh ka por, u bah Minun ula kyrpad ia ki briew ban wan jngohkai sha katei ka jaka ryngkat ka akor ka burom, ban ym bret jaboh khamtam ki bitor, ki plastik kiba dei ki nongshun ka mariang.
Ki mawbah ryngkat ki khanatang ha shnong Maw-ah
