SHILLONG: Ka lympung ialehkai ba heh tam ha ka jylla ka Meghalaya Games kaba San, ka la poi noh sha kaba kut ha ka janmiet jong ka sngi Saitjain jong ka taiew kaba la dep ha PA Sangma, Stadium, Tura West Garo Hills District, kaba ha kane ka janmiet ba la pynhap noh artad ia ka pyrda ka jong ka, la pynbna iar shi syndon ba ia kane ka lympung kaba dei artad kaba hynriew, kan long pat ha u snem u ban wan ha West Jaintia Hills District.
Haba iadei bad kan, la ioh ia ka lad ban iakren bad u MLA ka Jowai u ma Wailadmiki Shylla, ha ka por ba u la leit ban sakhi shipor ia ki kato katne ki phainal jong ka jingiakob siat khnam (archery) jong ka Meghalaya Games kaba san ba la long ha ka sngi Saitain ha Tura.
Ha kaba nyngkong u bah Wailadmiki, u sngew ban ai khublei ia u Myntri Rangbah ka jylla bad ia u Myntri ba dei khmih ia ka tnat Sports ba kin pdiang naka bynta ban pynlong ia ka Meghalaya Games ha u snem u ban wan.
U Bah Wailad u sngew ba da ka jingioh ban pynlong pat ia kane ka lympung kan dei ka jingkyrkhu ia ki khun samla jong ka ri lum Jaintia, da kaba u shim syndon ia ka kabu ba un da ai khublei ia baroh ki samla jong ka Jaintia bad khamtam lei lei ia ka kynhun ba la ialehkai ha ka athletic da kaba ki la lah syndon ban ioh ia ka khusnam lahduh ne ki overall champion ha kane ka jait jingialehkai.
Kumta kane ka jing ioh lad ban pynlong ia ka Meghalaya Games kan nang ai mynsiem shuh shuh ia baroh ki samla ialehkai bad ha ka juh ka por u la ong biang da ka jingioh ban pynlong ia kum kane ka lympung u kyrmen ban ioh ia ka lad ban nang pynbha shuh shuh ia ki ba bun ki shlem, ki jaka ne wat ia ki madan ialehkai.
Da kumta u bah Wailadmiki u sngew ba ma u hi shimet u da pdiang shisha da ka mynsiem kaba kmen ia kane ka jingioh ban pynlong ia ka Meghalaya Games ha West Jaintia.
Haba tih kham bniah halor ka jingbym pat da don than eh jong ki shlem, ki madan bad ki jaka ban pynialehkai ha kane ka district, u bah Wailadmi u pynpaw ba kumba ka long ia mynta, lada dei ban pynlong ia kane ka lympung, kum ka district kan dang donkam shibun ki jingdonkam kiba hap ban pynbiang hynrei u kyrmen ba da ka jingiatrei lang khlem pep bad u la pynkynmaw ba ha ka 23 tarik mynta u bnai, kan don ka jingplie paidbah noh ia ka madan ialehkai Phutbol ha Wahiajer, bad hadien kane, kum u nongmih khmat yn sdang ban iakren noh bad ka tnat sports ba shen la dei pat ka por ban sdang noh ka jingpynkhreh naka bynta ka jingpynlong ia ka Meghalaya Games kaba 6 ha West Jaintia Hills.