TURA: Ki thei ialehkai football jong ka Ri Bhoi District lem bad ka East Khasi Hills District ki la jam pat mynta sha ka phainal jong ka jingialehkai phutbol ha ka lympung ialehkai Meghalaya games kaba san.
Ha ka jingiakhun ia ki semifinal kiba la long mynta ka sngi ha PA Sangma Stadium, Tura, na ka liang ki thei ialehkai jong ka Ri-Bhoi District ki la lah ha kaban pynliem noh ia ka Eastern West Khasi Hills District da 5-1.
Ka nam tam ha kane ka jingiakhun dei ka Imaia Shylla kaba marwei ka la ioh ba kan thep haduh 4 tylli ki kol bad sa shi kol la thep ia ka da ka Rimika Khongkai, katba ia ka shi kol naka bynta ka Eastern West la thep ia ka da ka Rympeibasuk Syiemlieh.
Katba na ka liang ki thei ialehkai jong ka East Khasi Hills ki la lah ban pynliem noh da 5-0 ia ka South West Khasi Hills, kaba hangne ka nam tam jong ka jingiakhun dei ka Inrilaidor Khongthaw, kaba la ioh ban thep ar kol, bad ia ki kol kiba sah la thep ia ki da Melaribha Lyngdoh, Ibashembha Khongsit bad ka Ideibanrishisha Kharpan.
Jam ki thei ka Ri Bhoi bad East Khasi sha ka phainal ka kynjatbol ka Meghalaya Games
