SHILLONG:U Syiem ka Hima Khyrim u Dr. Balajied Sing Syiem ula aiti ia ka sanad ha u sordar ka Raid Mawlam u Rangbah Mani Mawpat ha ka jingialang mynta ka 17 tarik Kyllalyngkot 2024 ha ka jingialang kyrkhu kaba long ha shnong Mawlam.
Ha kane ka sngi la sakhi lang u Basan ka Raid Mawlieh, ki sordar ki Raid ka Riwar Mihngi bad ki nongshong shnong ka Raid Mawlam.
U syiem ula kyrkhu kyrdoh ba ka Raid Mawlam kaba dang bat dang ksoh ia ka jinghikai u mynbarim kan nang pynskhem ia kane ha ka niam ka rukom, ka synshar, ka riti dustur. Ula aiti ia ka sanad ha u sordar thymmai u bah Mani Mawpat hakhmat ki paidbah ha kane ka sngi ha ka jingsakhi kiba bun balang, un synshar hok ban peit ia ki sem shiliang kup shiliang na bynta ka bit ka biang ka Raid baroh.
Shwa ia kane, u sordar u bah Mani ula ong la ong ba ka synshar khadar ha u Khasi ka dei kaba bha tam haduh ba u Chairman ka Drafting Committee ia ka riti synshar ka ri u Dr. BR Ambedkar ula mynjur ia ka jingiaksaid u bah JJM Nichols Roy ban pynkup bor ha ka Sixth Schedule ka riti synshar ka ri.
Ai sanad u Syiem Khyrim ia u Sordar ka Raid Mawlam
