SHILLONG: U president ka Meghalaya Pradesh Congress Committee (MPCC), u bah Vincent H Pala u la ong ba ym don ba sngewtynnat satia ia ka jingsynshar jong ka Sorkar MDA ha ki 5 snem 10 bnai ba la dep, hynrei tang namar ba don ka jingsngewmeng sngewheh (ego) jong ki nongialam na ka seng Congress ka Sorkar MDA ka la ioh lad biang ban synshar sa shisien.
U la ong ba ki paidbah mynta ki la sngewthuh ia kane bad kin sa pyrkhat bha naduh ka jingjied ha ka election Lok Sabha ka ban sa long mynta u snem.
Haba kynthoh halor ka jingtreikam ka Sorkar MDA, u Bah Pala uba dei ruh u MP ka Lok Sabha u la ong ba ka Sorkar MDA kaba la leit bad kaba mynta kam shym la lah ban bat ia ki kular kumba ka la khlei ban pynbiang kam ia kumba 5 lak ngut ki samla, namar haduh mynta wat tang 1 lak ngut ruh kim ioh ia ka kam kaba biang, bad lada kheiñ kane ka kular ka la shu kylla ‘zero’.
U la ong shuh shuh ba ha kaba iadei bad ka jingkular ban pyllait tih ia u dewiong ruh ‘zero’, pynban la shu pynmih bun tylli da ki karkhana saiñ dewiong ‘Coke plant’ kaba pynkylla bih ia ka lyer ba ki paidbah ki pyndonkam, ha kaba u la ong ruh ba namar ka jingdon ki karkhana Coke, ki paidbah ki pynlong ‘orange festival’ khlem u sohñiamtra.
U la kynnoh ruh ba ki rai ba la shim da ka Sorkar MDA ku dei beit tang na ka bynta ban ioh lum pisa, ba kane ka Sorkar ka la pynjot ia baroh kawei ka Jaintia Hills, ka West Khasi Hills bad kumjuh ruh baroh ki jaka khappud.