SHILLONG: U Nongaiktien ka NPP u bah Himalaya Muktan Shangpliang ula pynshai ba ka jingweng noh ia ki ophisar na ka Meghalaya Lokayukta ka dei namar ba ka sorkar kala ioh da ki briew kiba thymmai kiba long katkum ka ain. Katkum ki rule ka Lokayukta kam shah ban thung ia ki ophisar kiba la shong thait.
Haba pynshai halor kane mynta ka 8 tarik Kyllalyngkot 2024, u bah Shangpliang ula ong ba kine ki ophisar kiba la weng ki dei kiba la shongthait na ka kam hynrei ka sorkar kala thung ia ki ha kato ka por tang shi por namar ba kam pat ioh da kiwei kiba dang don ha ka kam. Dei hadien ba kala ioh ia ki ophisar kiba dang don ha ka kam kaba long katkum ka ain Lokayukta, la weng noh ia ki. Ki ophisar kiba dang thung thymmai ki dei u IW Ingty kum u Director ka Inquiry, Chalang G Momin, John C Sangma bad u Baniateilang Diengngan kum ki dkhot.
Kiba shah weng noh ki dei u J Rymbai u Director ka Inquiry & Prosecution, u Inquiry officer u R. Pde bad u Anil K Sangma.
Ula ong ba ka sorkar kam don bor eiei bad kam don bynta eiei ha ka jingthung ne jingweng namar ba ka shong ha u Secretary uba thung ia ki bad ka jingkynnoh ka seng Voice of the People Party (VPP) ia ka ophis u Myntri Rangbah bad ia ka sorkar kam don nongrim eiei.
Ki ophisar ba shah weng na ka Lokayukta ki dei kiba la shongthait, thung ka sorkar da kiba thymmai: HM Shangpliang
