SHILLONG: Ka election na ka bynta ban jied thymmai ia ki MDC haduh mynta ym pat lah satia ban pynthikna la kan long kumba dei ban long lane kan shah pynslem namar ka jinghap ban pynbeit thymmai ia ki constituency ha ki ar tylli ki district council (KHADC/JHADC).
Ia kane ka mat la iakren ruh hapoh ka dorbar tlang jong ka KHADC ha ka motion ba la wanrah da u nongialam ka Liang Pyrshah, u Bah Titosstarwell Chyne.
Haba jubab na ka liangf u Chief Executive Member u bah Pyniiad Sing Syiem u la ong ba haduh mynta ym pat tip la ka election kan long kumba dei ban long lane kan kham slem, hynrei ka jingpynkhreh ka la iaid.
Ha kaba iadei bad ka Delimitation Committee, u CEM la ong ba hadien ba la shimti ban ialam ia ka EC la ioh bun tylli ki shithi na ki shnong ban peit bniah biang ia ka jinglong ki constituency, bad ia ka jingthung ia ka Delimitation Committee la leh katkum ka jingbthah jong u Lat ka Jylla.
U la ong ba ki constituency ba la pynpaw ia ka jingdonkam ban pynbeit thymmai ki kynthup ia ka Mawlai, Malki-Laitumkhrah, Nongstoiñ, Rambrai, Mawshynrut namar kam don shuh ka jingiaryntih ha ka jingdon paid bad kumjuh ki jinglong jong ki jaka. U la ong ba dei halor kine ki nongrim ba ka executive committee ka la thoh sha u Lat ka jylla uba la pynmih ia ka jingbthah ban pynbeit thymmai., bad bynrap ba ka shong ha ka Sorkar lyngba ka tnat District Council Affairs ban pynbna ia ka tarik election.
Ka samoi treikam jong ki MDC kan kut noh ha ka 4 tarik Lber jong u snem 2024, bad ha u Rymphang ka jingjied thymmai ia ki MDC ka la dei ban long, hynrei namar ka jingpynbeit thymmai da ki Delimitation Committee ia ki constituency ha KHADC bad JHADC, haduh mynta kiba thmu ban iakhun ia ka election ki dang kulmar.
Haba kren ha ka por ba wanrah ia ka motion u Bah Titos u la ong ba ka la don ka jingkulmar jingmut, hato kata ka election kan long ne ym long ha u snem 2024, bad ki MDC kim lah ban jubab bad wat ka executive commuttee ruh kam lah ban jubab. U la ong ba ka jingthaw ia ka Delimitation Committee ka long kaba biang, hynrei kadei ban ban buh por.