SHILLONG: Ka jingiakop khun kti ka All India Arm Wrestling Championship ka la kut noh mynta ka sngi ha Soso Tham Auditorium.
Ha kane ka jingiakop khun kti kaba la neh ar sngi kynthih, la wan iashim bynta da ki samla na kylleng ki jaka jong ka ri.
Ia kane ka jinngiakop khun kti la pynlong da ka People’s Federation of Arm Wrestling India ha ryngkat ka jingiatreilang bad ka Bouncers Association of Meghalaya bad ka Treilang Welfare Society bad la ai bei tyngka da ka tnad Sports and Youth Affairs ka sorkar jylla.
U Myntri Rangbah ka jylla u Conrad K Sangma ha kane ka sngi u la wan ban sakhi ia kane ka jingialehkai hapdeng ka jingiakhun jong ki khynthei ba ki shynrang.
Haba kren ha kane ka sngi, u Conrad u la ong ba ka sorkar jylla ka don ka jingthmu ban kyntiew ia ka kam lehkai ha ka jylla.
“ Ha kine ki san snem ba ladep, ngi la trei shitom na bynta ban kyntiew ia kiba bun ki jait jinglehkai bad la kyntiew ruh ia ki jaka lehkai. Ngi la pdiang ruh ia kiba bun ki jinglehkai ha kane ka jylla kum ka Grandmaster Chess Tournament, kaba la kut noh hynnin ka sngi,”u la ong.
“ Ka All India National Boxing Championship, All India Table Tennis Championship kidei kiwei na ki jinglehkai ha ka ri kiba la long ha nongbah Shillong. Ka long kaba sngewtynnad ban iohi ba ka jylla Meghalaya ka la kylla long kum kawei na ki jylla kaba lah ban pdiang ia ki jinglehkai,” u la ong.
Shongshit ka lympung iakhun kti ba sakhi lang u myntri rangbah
