SHILLONG:Ka Mawmluh Sirdarship ka shnong kaba don tang kumba 200 tnum ïing eiei, shisien mynno ka dei kaba riew spah bha ha ka por ba ka karkhana sain dewbilat ka Mawmluh Cherra Cement Limited ne MCCL ka dang thnem bha shwa u 2014.
Hynrei ha kine ki khyndiat snem, ka la don ka jingtynjuh kaba jur bha ia ka shnong namar ba kane ka karkhana MCCL kaba peit bad pyniaid ka sorkar kala troin. Hynrei, mynta hapdeng ki jingeh, ka wan sa kawei ka lad bad kata ka dei ka karkhana jngohkai pyrthei. Watla ka kam jngohkai pyrthei kam pat lah ban bsa ban ai kam kumba long ka karkhana MCCL hynrei kala sdang ban khie namar ba ka Mawmluh ka don bun ki jingthaw ka mariang kum ka krem mawmluh bad kiwei kiba khring ia ki paidbah.
U sirdar ka Mawmluh u bah Pynskhemborlang Kharwanlang ula iathuh ba ka long ka jingshisha ba ka kam jngohkai kam pat lah ban ai kam ia ki longïing kumba leh ka karkhana MCCL hynrei la kyrmen ba kane kan sa lah ban leh kham bha ban kyntiew ia ki nongshnong ha kine ki ban wan.
Kyrmen ka Mawmluh ban mih bujli ka karkhana jngohkai ha jaka ka MCCL
