SHILLONG: Ka Hynniewtrep Achik National Movement (HANM) mynta ka sngi ka la aipor 10 sngi ia sorkar jylla lyngba u Chairman jong ka Regional Committee ka Ri-bhoi district na bynta ban tuklar halor ka jingkyntur pud Assam ha ki jaka khappud.
Haba kren sha ki lad pathai khubor, u Secretary ka HANM u bah Kyllang S Thongni, u la ong ba ka ha jingialang jong ka Central executive meeting (CEC), la shim ia ka rai ban dawa na ka sorkar jylla ba kadei ban tuklar ia ka jingkyntur pud ka sorkar Assam da kaba shna beain ia ka surok ha Baklapara kaba dang hap hapoh ka Ri-bhoi district.
U bah Thongni u la ong ba na ka por sha ka por , la iohi ba ka sorkar Assam ka ju pyrshang ban kyntur pud na khappud Ri-bhoi district hynrei haduh mynta ka sorkar jylla kam shym la leh eiei na bynta ban khanglad ia kane ka jingkyntur jong ka Assam.
U la ong ba ka seng ha kine ki sngi ba wan kan sa pynlong ia ka jingialang bad ki khlieh nongsynshar jong ka Hima Nongspung na bynta ban iakren bad ka jingkyntur pud ka sorkar Assam ha Ri-bhoi district.
10 sngi buh por ka HANM ia ka sorkar jylla ba tam pud ka Assam
