SHILLONG: Ka Pyniar FC ka la rah ia ka namlahduh ha ka jingialehkai kynjatbol ba la pynlong da ka Confederation of Ri Bhoi People (CoRP) Raid Madan Kyrdem Circle hadien ba ka la pynliem ia ka Nongrim Nongladew FC ha ka tie breaker hynnin ka sngi Saitjain ha madan ialehkai ha shnong Nongpyrdet, Ri Bhoi District.
Haba phai ha ka jingiakhun ka long kaba iakhaid bad itynnad na ka jingialehkai bha ki pleiar na baroh arliang ioh pynkhih jar, kane ka la urlong ha kylla miet ba ka Pyniar FC lyngba u Rangdondor Shylla ban thep ia kol nyngkong bad shwa ban kur ka jingialehkai ka Nongrim Nongladew ka la pynphai kylla ia katei ka kol da u Wilshai Lyngdoh ban pyniakhaid da 1-1 kol. Ia ka jingialehkai la hap ban pyniakhun da tie breaker ha kaba ka Pyniar FC ka la pynliem ia ka Nongrim Nongladew ban rah ia ka namlahduh.
Ha kane ka sngi u bah Ransom Sutnga President ka Mawkhar sports club ula long u kongsan ha ka jingdonlang u bah MD Syiem bah Bandary Ryntathiang President ka CoRP sengkmie u bah Pateng Marsing working president bah Karbius Lyngdoh vice president ki riew rangbah bad ki dkhot ka seng Raid madan Kyrdem.
Ia ka khunsnam trophy ryngkat ka song pisa T.40 hajar la sam da u bah R Sutnga bad u MD Syiem ki la sam ia trophy ryngkat ka song pisa ba T.25 hajar sha ka kynhun Nongrim Nongladew FC katba ia ki medal la sam da bah Bnadari Ryntathiang bad u bah Pateng Marsing.
Kham shwa haba ai jingkren u bah Sutnga la iaroh ia ka jingdon sap ki khynnah na Ri Bhoi bad ka la sei bun ki khynnah ialehkai phutbol bad ula bynrap ym dei tang ba ki donsap ki don ruh met bad ka rynieng kaba biang.
Ula ong dang shen ha ka jingyrshang ka klob ban jied khynnah ki don palat 500 kiba shim bynta bad 7 ngut ki khynnah na Ri Bhoi ki la shah jied ban pyntbit ia ha ka jinglehkai phutbol.
Kiwei pat kiba ai jingkren ki long u bah MD Syiem bah Bandari Ryntahthiang bad kyntu kynpham ia ki khynnah ban kiar na ki jingdih ba sniew kiba ktah ia ka koit bad khiah ban pynlut por ha ki jingialehkai namar ha kajuk mynta ka jingialehkai phutbol ka dei kawei ka lad ai kam ai jam ia ki khynnah samla.