SHILLONG: Ka Dorbar Shnong Mawpat ka don ia ka jingangnud la slem ban pynhap noh ia ka shnong Mawpat ha Pynthorumkhrah konstiwesni lane ha kino kino ki konstiwensi kiba hajan ha ka ilekshon MDC ka KHADC.
Ha ka jingiakren bad u Rangbah shnong ka Mawpat u bah Juda Wahlang u la ba hadien ba ka shnong ka la ioh jingtip ba na ka liang ka District Council ka la don ia ka Delimitation Committee ka ban bishar ia ki shnong ha ki konstiwensi ba donkam ban phiah, ka Dorbar shnong ka la phah jingthoh sha kane ka Committee bad kyntu ba kan pyrkhat bad ban pynhap ia ka shnong Mawpat ha ka Pynthorumkhrah konstiwensi lane ha kino kino ki konstiwensi kiba marjan.
“ Ngi na ka liang ka Dorbar shnong ngi la phah jingthoh bad kyntu ia ki ba kin pyrkhat lem ia ka shnong Mawpat, hynrei ngim la ai ia kano kano ka daw balei ngi kwah ban pyllait noh ia ka jinghap ka shnong Mawpat ha Mawlai bad ngim shym kdew ban ai iangi sha kata kata ka konstiwensi hynrei ngi la ieh ha ka jingstad jong ki,” ong u bah Juda.
Katkum ka jingong u Rangbah shnong ka Mawpat, la ong ba ka jingiasnoh bad ka Mawlai konstiwensi ka la long shisha kum kawei na ka Dewlynnong namar la hap ban iaid lynba kawei ka konstiwensi bad haba nujor ia ka jingbun paid ruh kam iahap shuh bad ka shnong Mawlai bad ka jingdon ka jingdon ki nongthep vote ruh ka dang long tang jingtroh haba nujor bad ka Mawlai.
“Ka shnong Mawpat haba bishar ia ka jinglong jingman bad khamtam ia ka jingbun briew, ym sngew iahap shuh ban don bad ka Mawlai konstiwensi namar ba ka jingbun paid ka Mawlai ka long kumba 40 ne 50 hajar katba hangne ha Mawpat ka jingbun paidbah ka dang long tang kumba 10 ne 12 hajar ngut bad ka jingdon ki nongthep vote ka dang long kumba 4000 tam,” ong u Rangbah shnong ka Mawpat.
U Rangbah Shnong ka Mawpat u la pynpaw ia ka jingeh ban ioh ia ka jingiatreilang hapdeng ki nongshong shnong ka Mawpat bad ki MDC namar ba ka hap ban iaid lyngba na ka konstiwensi Pynthorumkhrah.
“Ngin jin da sngewtynnad bad sngewnguh shibun ba na ka liang ka Delimitation Committee ka KHADC kan pyrkhat na ka bynta jong ngi ka shnong Mawpat da kaba pynhap iangi sha Pynthorumkhrah ne sha kano kano ka konstiwensi ba marjan ruh ngin nym don jingeh,” ong u bah Juda.
Haba kylli halor ka jingioh bynta ia ki skhim, u bah Juda u la ong, “Lada iathew bin-pa-bin bad lada nujor bad ki shnong kiba hap ha thain Mawlai, ngi la duna shaba palat. Hynrei ngim pat shah kyntait ne shah ieh bein ha watla ki.”
La bynrap, “ Lada jia ba nga long kum u MLA ne MDC, lada ka jingdon ki nongthep vote ki don tang khyndiat ruh ha kano kano ka shnong, ka dei ka kamram jong nga ban shim ba ka long ba kordor bad katba lah lada ioh ia ki lad jingmyntoi, ka long ia kaba ngin ia ioh mar ryngkat bad kata ka long ka jingpynhun ia uba la leh bha bad kan long ruh ka jinghun hapoh ka konstiwensi.
Kwah ka Mawpat ban ia lait noh na ka Mawlai ha ka MDC
