SHILLONG: Ka United Nations, lyngba ka UNESCO bad ka UNDP, ki la pynkhreh ban iatreilang, na ka bynta ban pynneh pynsah, ia ki diengjri, ha ka Raid Shabong bad ia katei la iathuh, da u Bah Manbhalang Khonglah Vice Chairman Living Bridge Foundation.
Haba iakren bad ki nongthoh khubor ha ka sngi Baar, U bah Manbha, u iathuh, ba ki don 35 tylli ki tynrai dieng jri, ha ka shnong Mynrieng, Rangthylliang bad Mawkyrnot, kiba kin ia peit ia sumar, ha ki 24 snem ki ban sa wan.
U bah Manbha u la iathuh ba ki jingkieng jri kila nang paw kylleng ka pyrthei na ka jingwan wad bniah ki stad bapher na ki skulbah nabar ri. Bad kaba kham sngew tynnad ka long ba ka phlim ‘Unseen Meghalaya’, kaba shna ka kompeni Canon kaba shna ia ki camera halor ki jingkieng jri ka la ioh khusnam na ka Cannes, bad kala ioh ia ka khusnam Best Shot Documentary Film, nangta ka Dada Saheb Award.
Na ka liang U bah Morning Star, Chairman ka Heritage Committee Khun Kur Longtrai, u iathuh, ba ka jingthmu jong katei ka jingpynneh ia ki diengjri, ka long ruh ban ai kam ai jam ia ki briew, kiba hap ha kitei ki shnong bad ban shna pynbha, ia ki jaka kiba don hajan ki diengri, ba kin suk, ki nongleit jngoh kai, sha kitei ki diengjri.
U la iathuh ba kane ka projek kaba bei pisa na ka UN T.20 lak, kan long ban kyntiew, ban pynbha, bad ban pyndonkam ia ki trai shnong ba kin ioh jingmyntoi na kane ka kam.
Ka jingiasoi ia ka jingiasngewthuh jingmut hapdeng ka Heritage Committee ka Khun Kur Longtrai Lai Kynthei bad ka Living Bridge Foundation ka long kumno ban ia ki jingkieng jri, ban shna maw shong thait, ban shna ia ki lad thymmai lyngba ki soh ki pai kiba don ha shnong, ban buh jingthoh ia ki jingstad tynrai, ia ki jinghikai ki longshwa manshwa bad ban hikai ia ki khynnah ba kin long ki enjiniar ban shna jingkieng jri.
Ha kane ka sngi, la sakhi lang u Syiem Khynnah ka Hima Khyrim u H Syiem, ka SDO (Civil) Pynursla, kong EL Warjri, ki ophisar na ka tnad jngohkai, nalor kiwei pat ha ka jingialang kaba long ha Rangthylliang.
Wan pule bniah ka samla na Germany ia ki jingkieng jri ha Ri Khasi
