SHILLONG: Katkum ka khyrnit ba hynriew ka riti synshar ka ri ka kyndon 6-A, ka la kren ba u Lat ka jylla u lah ban pynwai noh ia ka samoi jinglong MDC katkum ka paragraph ba 16, lane u lah ban pynjlan ia ka samoi jinglong MDC lada don ki daw kiba skhem ban pynieng halor kata.
Ka KHADC mynta ka la pynkhreh ban pynwandur thymmai ia ki 29 tylli ki konstitwensi namar ba ki don kiba duna briew palat bad ki don kiba la bun briew palat khnang ba ka jingsam ia ki jingiarap kan ym long kaba noh shiliang.
Ka Delimitation Committee jong ka Khasi Hills Autonomous District Council (KHADC) kala pynbna ban sdang noh ia ka jingsngap paidbah ne public hearing ha palat 23 tylli ki constituency kum shibynta na ka jingpynkhreh ia ka Delimitation Bill hashuwa jong ka elekshon MDC ka ban long ha u snem bala lah.
Watla ka KHADC ka la bthah ia ka Committee ban pyndep kloi ia ka kam hynrei, lada jia ba kam lah ban pyndep ha ka por kaba biang, ka KHADC ka lah ban thoh sha ka sorkar jylla ba kan bthah ia u Lat ban pynjlan shwa ia ka samoi jinglong MDC bad ban rah ia ka elekshon sa katto katne por tad haduh ban pyndep ia ka kam.
Katkum ka ain, u Lat u lah ban pynjlan ia ka samoi shisien pynbna hapoh 6 bnai bad hadien kane, lada dang donkam, u lah ban pynjlan biang hapoh hynriew bnai.
Katkum ka khubor ba la ioh lum, lada jia ba ka Delimieation Committee kam lah ban pyndep ia ka kam hapoh ka por ba la buh, ia ka elekshon MDC, lah ban pynjlan shwa haduh ban dep ka kam.
Ka Delimitation Committee ka la pynbeit sngi ruh ban pynlong ia ka jingsngap paidbah ia ki 23 tylli ki constituency, ka ban sdang naduh ka 21 tarik Naiwieng haduh ka 15 tarik Nohprah.
Ka elekshon MDC kan dei ban long ha u Rymphang u snem ban wan bad sa shi bnai tam, kan long kaba eh ban pyndep ia ka kam.
Ka jingsngap paidbah ha ki ar tylli ki constituency ka South West Khasi-ka Mawkyrwat bad Langrin kan long hapoh ka Ophis jong ka District Council ha Mawkyrwat ha ka 21 tarik Naiwieng.
Ha Mairang, Eastern West Khasi Hills kan long ha ka 24 tarik Naiwieng bad ha Shillong East Khasi Hills n aka bynta ka Sohryngkham, Mawkynrew, Nongkrem, Langkyrdem Laitkroh, Nongshken bad Mawsynram) kan long ha ka 28 Naiwieng.
Ha Sohra Civil Subdivision (ia ka Sohra bad Shella) yn pynlong ha ka 1 tarik Nohrah. Ha Nongpoh, Ri Bhoi (ia ka Jirang, Nongpoh, Mawhati, Umsning bad Umroi) yn pynlong ha ka 6 tarik Nohprah.
Ha Shillong (ia ka Mylliem, Laban-Mawprem, Nongthymmai, Laitumkhrah-Malki, Mawkhar-Pynthorumkhrah, Jaiaw, Mawlai, Mawphlang, Diengiei bad Nongspung-Sohiong) yn pynlong ha ka 13 tarik Nohprah bad ha Nongstoin, West Khasi Hills (ia ka Nongstoin, Rambrai-Jyrngam bad Mawshynrut) yn pynlong ha ka 15 tarik Nohprah.
Hato yn pynjlan ia ka elekshon MDC sha ka KHADC
