SHILLONG: Ka United Democratic Party (UDP) mynta ka sngi ha ka jingialang jong ka Central Executive Committee (CEC) ka la shim ia ka rai ba kan iatreilang bad ka HSPDP hapoh ka lama jong ka Regional Democatic Alliance (RDA).
U Nongialam ka UDP u bah Metbah Lyngdoh haba kren sha ki lad pathai khubor hadien ba la wai ka jingialang, u la ong ba da kawei ka sur ka party ka la shim ba kan iaid shakhmat ban pyntyllun ia ki kam jong ka RDA.
“Ngi la shim ia ka rai ban nang pynskhem bad ban nang iaid shakhmat ha ka jingiadei jong ka UDP bad ka HSPDP hapoh ka lama jong ka Regional Democratic Alliance (RDA),” ong u bah Metbah.
Haba iadei bad ka MP ilekshon, u bah Metbah u la ong ba kan don ka jingiatreilang ryngkat hapdeng ka UDP bad HSPDP na bynta ban pynieng ia u kyrtong na bynta ka MP ilekshon.
Katba na bynta ka Tura Parliamentary seat, ka CEC ka la rai ban pynkhamti ia ka Core Committee jong ka party ryngkat bad ki katto katne ngut ki nongialam jong ka party na Garo Hills ban shong pyrkhat haba iadei bad ka MP.
Nalor kine, ka CEC ka la mynjur ruh ia ka State Election Committee na bynta ka MP ilekkhon bad ka MDC ilekshon.
“Ngim pat don kano kano ka jingiakren haba iadei bad u kandidet hynrei la ieh ha ka jingstad jong ka State Election Committee na bynta ban jied ia ki kyrtong bad ban pyrkhat haba iadie bad u kandidate ka party,” u la ong.
La ong ba ka CEC ka la bthah ruh ia baroh ki District bad Circle ba kin nang pyntyllun shakhmat ia ki kam ka party bad ban pyntikna ba kin long kiba la kloi ban iakhun ia ka ilekshon lada wan ha kano kano ka por.
La ong ba kane ka jingiatreilang hapoh ka lama ka RDA ka long ban bteng ia kaei kaba ki la ju iatrei baroh shi katta bad ia mynta kan long shwa tang ia ka MP ilekshon.
Haba kylli halor ka jingdon jong kiba pan tiket na ka UDP, u bah Metbah u la ong ba haduh mynta don bun kiba pynpaw bad pynsngew ia ka jingangnud ban iakhun ia ka ilekshon hynrei ia kane la ieh ha ka State Election Committee ban iaid na bynta ban rai ia u kyrtong ban iakhun.
Yn jied kyrtong MP bad MDC ka CEC ka UDP
