SHILLONG: U Symbud Myntri Rangbah ka Jylla uba khmih ia ka Kam Pohïing (Police), u Bah Prestone Tynsong u la ong ba ka Sorkar Jylla kan sa shong bishar halor ka aiñ teh lakam mynder, hadien ba ka Ministry of Home Affairs ka la pynphai ia ka Meghalaya Residents Safety and Security (Amendment) Bill, 2019 dang shen.
Haba kren hynne ka sngi Thohdieng, u la ong ba ha ka taiew ban wan kan don ka jingiapyrkhat biang halor kane ka aiñ ba la mynjur da ka ïingdorbar jong ka Jylla, ha kaba yn iaphylliew jingmut lang bad u Myntri Rangbah, u Conrad K Sangma bad katto katne ki heh ophisar ryngkat u Advocate General ka Jylla.
Halor ka jingpyntreikam ia ka Meghalaya Residents (Safety and Security) Act, 2016 ha ki katto katne ki bynta ka East Khasi Hills, u Bah Prestone u la ong ba kane ka jingpyntreikam ia ka MRSSA kam dei kaba la pyntreikam dang mynta, hynrei na ka liang ka Sorkar ka la thung ruh ia ka District Task Force ba la khlieh da ki Deputy Commissioner bad ki Superintendent of Police jong ki district kum ki dkhot ka Task Force, bad lyngba ki Task Force la bthah ban pyntreikam ia ka MRSSA ha ki district.
Ha kaba iadei bad ka khyrdop (entry/exit point), na ka liang u Bah Prestone u la ong ba ia kane ruh yn hap ban iakren biang ha ka taiew ban wan namar ka hap ha ka MRSS Amendment Bill.
Shah pynphai ka MRSSA na ka MHA, la shem taïew yn iathir jabieng biang ka Sorkar
