SHILLONG: Hadien ba kam shym la don ha ka thup ki jait ktien ban pynrung ha ka Khyrnit ba Phra ka Riti synshar ka ri, ka ktien Garo mynta ka la lah ban ioh bsuh khlieh lang ha ka thup kyrteng lem bad ka ktien Khasi nalor kiwei, ban iakhun ban ioh rung lem ha ka riti synshar ka ri.
U Lamphang ka ïing dorbar ka jylla, u Thomas A Sangma u la pynthikna ia kane mynta ka sngi hadien ba ki nongialam ka NPP na Garo Hills kynthup u ma u lem bad ka MP ka Agatha K Sangma bad ki nongialam ka Achik Literature Society (ALS) kila iakynduh ia u Home Secretary ka sorkar India u, Ajay Kumar Bhalla ha kane ka sngi Thohdieng.
Ka tnad kam pohïing ka sorkar India ka la pynthikna ba ka ktien Khasi bad Garo kin dei napdeng ki 32 tylli ki ktien ban iakhun ban iaknieh ban ioh rung ne ithuh ha ka Khyrnit ba Phra ka Riti synshar ka ri.
Ha ka jingshisha, ka ktien Garo kam shym la rung ha ka thup kyrteng hynrei hadien ba la iakynduh ki nongialam ka NPP bad ka ALS, ka sorkar India ka la kular ban kynthup lang ha ka thup kyrteng.
Ki jait ktien kiban iakhun ban ioh rung ha ka khyrnit ba phra ka riti synshar ka ri ki long ka Angika, Banjara, Bazika, Bhojpuri, Bhoti, Bhotia, Bundelkhandi, Chhattisgarhi, Dhatki, English, Garhwali (Pahari), Gondi, Gujjar/Gujjari, Ho, Kachachhi, Kamtapuri, Karbi, Khasi, Kodava (Coorg), Kokborok, Kumaoni (Pahari), Kurak, Kurmali, Lepcha, Limbu, Mizo (Lushai), Magahi, Mundari, Nagpuri, Nicobarese, Pahari (Himachali), Pali, Rajasthani, Sambalpuri/Kosali, Shaurseni (Prakrit), Siraiki, Tenyidi, Tulu nalor ka Garo.
Rung sa ka ktien Garo ban sa ithuh ha ka Khyrnit ba Phra ka Riti Synshar
