SHILLONG: U Chief Executive Member (CEM) barim ka Khasi Hills Autonomous District Council (KHADC) u bah Teinwel Dkhar u la ong ba ki don shibun kiei kiei kiba hap ban iakren hynrei kawei ka mat kaba sngew kumba ka dei kaba rit hynrei ka long kaba donkam bha.
Haba kren mynta ka sngi, u bah Teinwel Dkhar u la ong ba ha ka por ba u long CEM, ia ka RR Colony la pynkylla sha ka Them Rynjah bad kan hap ruh hapoh ka jingpeit ka dorbar shnong Rynjah. Kane ka dei ka mat ka bym poi pyrkhat hynrei ka long pat kaba donkam watla um ju kham pynpaw sha ki lad pathai khubor.
“Ki don shibun kiei kiei khamtam iwei I mat I bym poi pyrkhat hynrei iba donkam. Ha ka por ba nga long CEM jong nga khyndiat watla ym pynpaw khubor than, hynrei ia ka RR Colony la lah ban pynkylla sha ka Them Rynjah. Ha ka jingshisha, ha kato (RR Colony) ka jaka, ym don Rangbah Shnong, hynrei ha kato ka por, la lah ban pynsngewthuh ban pdiang ba ka RR Colony kan hap ha Them Rynjah bad ban shim ia ki kot ki sla na u Rangbah Shnong”, la ong u bah Teinwel.
Kawei pat ka mat kaba ka Executive Committee kaba ialam ma u, ka long ba ka la tehlakam ban long rangbah shnong ki bym dei Khasi ha ka Raid Marwet, bad ka Council ka la shim khia bad la pyrshang ruh ban khang lad ia kane. Ha ka liang ka jingai trading license ia ki bar jylla ruh, la tehlakam bha ia ki bym dei Khasi.
“Ngi la adkar ruh ban ai trading license pathar khamtam ha thain Raid Marwet ha kaba ki sengbhalang, ki shnong ki thaw ki pynpaw ba ki Syiem Raid ha kaba ki don ki shnong kiba la jied Rangbah Shnong da ki bym dei Khasi bad ki don ki muhor ban pyndonkam ia ka bor ban thied jaka, ban ai jaka sah, ban ai patta, hynrei ka EC ha kato ka por, la shim khia bad la pyrshang ruh ban knieh noh ia kane, ioh ngi duh noh ia ka khyndew ka shyiap”, la ong u CEM barim ka KHADC.
Ka RR Colony ka la kylla sha ka Them Rynjah ha ka por ba long CEM bah Teinwel
