SHILLONG: Ka Khasi Hills Autonomous District Council (KHADC) mynta ka sngi ka la rakhe ia ka lyngkhuh sngi iap ba 64 snem jong u Rev. JJM Nichols Roy uba dei u kpa jong ka Sixth Schedule.
Ha kane ka sngi, ka KHADC ka la pynlong ia ka jingbuh syntiew hakhmat u motdur jong u JJM Nichols Roy bad la pynlonng ruh ia ka jingsngap jar ba shi minit kum ka dak ban kynmaw burom ia une u rangbah.
Haba kren ha kane ka sngi, u Chief Executive Member ka KHADC u bah Pyniaid Sing Syiem, u la pynkynmaw ia ka jingiaid lynti bad ka jingtrei shitom jong u JJM Nichols Roy ha ki phew snem mynshwa da kaba lah ban pynkohnguh ia ki nongsynshar ha Ri India ban pynrung ia ka kyndon na bynta ban iada ia ka jaidbynriew.
U bah Pyniaid u la ong ba ka jingiatylli bad ka jinglong jingman jong ki Riewlum kadei lyngba ka jingdon jong ka Sixth Schedule ba la aibor ia ka District Council ban iada ban pynneh pynsah ia ki riti synshar.
Ha kajuh ka por, u la pynpaw ia ka jingsngewsih ba ki don ki kynhun bad ki riew shimet ha kine ki sngi kiba ong ba dei ban pynduh noh ia ki ADC bad Sixth Schedule.
“Kiwei ki jylla ki dang kwah ia ka Sixth Schedule ngi pat hangne don ki kiba kwah ban pynduh noh ia ki Autonomous District Council,” ong u bah Pyniaid.
La bynrap shuh shuh, “ Kita kiba kwah ban pynduh, kim pat sngewthuh ia ka dor jong ka District Council, sngewbha wan iakynduh iangi, ngin batai kham bha kaei ka District Council bad kim dei dei ban shu byrngem tang ha ki jingialang paidbah ha surok, ha ki kot khubor hynrei kidei ban wan sha ka jingiakren ban sngewthuh bad ngam jylliew ia ka dor jong ka District Council.”
U la kyntu ia baroh ki ophisar ba kidei ban trei shitom bad kidei ban shim ia ka DC kum ka iing lajong ym ban trei kum ka ophis tang na bynta ia ka kamram lajong.
Kynmaw burom ka KHADC lyngkhuh sngi iap ba 64 jong u kpa ka Khyrnit B Hynriew
