SHILLONG: Ka myntri ka tnad ka koit ka khiah ka jylla ka kong Ampareen Lyngdoh ka la ong ba ka donkam sa kumba 40 klur tyngka eiei ha ka shi snem ban pynkiew ia ka jingsiew ia ki nongtrei ASHA kiba don kumba 7 hajar ngut eiei ha ka jylla.
Haba kren mynta ka 1 tarik Naiwieng 2023, ka kong Ampareen ka la pynpaw ia ka jingsngew lyngngoh balei ki ASHA ki dang sangeh trei haba ka sorkar ka la kular ban iakren pynbeit bad u Myntri Rangbah ha ka taiew ban wan.
Baroh ki jingdawa ki ASHA kynthup naduh ka jingai bai sumar lut, ban ym don shuh ka jingpyndkut kam ia ki ASHA tang namar ba la leh ki VEC ne Rangbah Shnong, bad kawei pat ka dei ban pynheh ia ka jingsiew, la pynthikna ban iakren ha kane ka taiew.
Ka la pynpaw ia ka jingsngew lyngngoh ia kane ka rai jong ki ban sangeh trei haba ka sorkar ka plie ia ka jingkhang ban iakren ban pynbeit ia ki jingeh jong ki.
Ka la kyrpad ia ki ban ym sangeh iakhih hynrei ban bteng ka jingshakri ia ki paidbah namar ba kam long kaba bha ban iatyngkhuh.
Lah ban kdew ba ki nongtrei ASHA kila rai ban sangeh trei naduh ka 30 tarik Risaw haduh 6 tarik Naiwieng 2023 ban pynbor ia ka sorkar ban pynurlong ia ki jingdawa jongki.
Donkam sa kumba T. 40 klur ban pynheh jingsiew ia ki ASHA, ong kong Ampareen
