SHILLONG: Ka sorkar Meghalaya ka la aiti ia ka jaka ha Mawpdang, Mawkhanu, kaba hap ha New Shillong sha ka National Law University Meghalaya bad ka Meghalaya State Judicial Academy ban tei ia ka skulbah jong ka ain.
U Myntri Rangbah ka jylla u Conrad K Sangma u la aiti ia ka dulir sha u Chief Justice, High Court, Meghalaya bad u Chancellor ka National Law University, Meghalaya, u Justice Sanjib Banerjee ha ka jingdon lang ka myntri tnad ain ka kong Ampareen Lyngdoh bad u myntri ka tnad pule puthi u Rakkam A Sangma nalor kiwei pat.
Haba kren ha kane ka jingialang, u Conrad u la ong ba ka sorkar Meghalaya kumba long lem kiwei, ka la iaid shakhmat ban kynshew bad theh spah ban kyntiew ia ka spah longbriew manbriew na bynta ka lawei jong ka jylla.
U la ong ba ka India ka dei ka ri kaba dang samla bad man ki samla ki dei ban synniang sha ka roi ka par jong ka ri.
Katba u Chief Justice, u Justice Sanjib Banerjee u la ong ba kane ka skulbah kan dei ka shlem ban sam ia ki tiar bad ki rukom bad kyrmen ba kan pdiang ia ki samla pule na kane ka jylla bad ula kyntu ban kyrshan ia kane ka shlem ba kan long ka nongmuna ha ka pyrthei.
Aiti ka sorkar ia ka jaka sha ka NLU bad ka JA ban tei ia ka skulbah ain
