SHILLONG: Ka Congress kam don jingwit ban iatreilang bad kino kino ki seng sain pyrthei lait noh tang ka Bharatiya Janata Party (BJP). Ia kane la ong u President ka Meghalaya Pradesh Congress Committee (MPCC) Bah Vincent H Pala mynta ka sngi Palei.
Ka Congress ka kyrshan ia ka Executive Committee (EC) ha Khasi Hills Autonomous District Council (KHADC) kaba ialam ka National People’s Party (NPP) watla ka ju kynnoh ba ka NPP ka dei ka team-B jong ka BJP.
U bah Pala u la ong ba ki seng sain pyrthei kim peit tang ia kawei ka liang hynrei kin peit ia ki liang bapher bapher bad ka jingiatreilang ha District Council ka dei namar ka jingiashrut hapdeng jong ki paralok ka NPP bad ka UDP.
“Ka party kam don jingpyrshah satia ia kane katba ki rule ki dang shah ia ki MLA ba kin iakhun (elekshon ADC)”, la ong u bah Pala.
U Bah Pala ula pyntip ruh ba ka rai ban kyrshan ia ka EC ka NPP ha KHADC ka dei ruh kaba la leh hadien ka jingiasyllok bad ki nongialam na Delhi.
Ha kajuh ka por, u Bah Pala ula ong ba ha ka jingsngewthuh jong u, ka BJP ka thrang bha ban pynkylla thymmai ia ka Sixth Schedule ka ban treikam ha ki 11 tylli ki ADC kiba don hapoh ka thain Shatei Lam Mihngi kynthup ha Meghalaya.
Ym don jingwit ban iatreilang badno badno, lait noh ka BJP: Congress
