SHILLONG: U Myntri ka tnad kam ri dohkha u bah Alexander Hek, u la ong ba ka jylla Meghalaya haduh mynta kam pat dei ka jylla kaba la lah ban pynmih dohkha tang kane hi ka jylla hynrei ka dang ban hap ban shaniah na kiwei ki jylla kum ka Andra Pradesh, Punjab, Karnataka bad kiwei kiwei de ki jylla.
Haba kren ha ka jingialang jong ka 7th Aqua Fest 2023 ba long mynta ka sngi ha phyllaw jong U Soso Tham Auditorium, u bah Hek u la pynpaw ruh ia ka jingsngew sarong namar ba u ruh u wan na ka longing bad u heh u san na ka longing ba khaii ne die dohkha.
U bah Hek u la ong ba ka kam ri dohkha kadei kawei na ka lad ba lah ban pynioh nong bad ban thaw lad ai kam ai jam ia kiwei.
Katba na ka liang ka Director ka kam ri Dohkha ka la ong ba ia kane ka Aqua fest la sdang nyngkong mynshwa ha u snem 2005 hapoh ka jingialam u Commissioner Secy u KN Kumar uba dei u IAS ba la shongthait ka sorkar jylla.
Ka kong Mawlong ka la ong ba lyngba ka Megha State Aqua Mission ba la plie ha u 2011, ka la pynktik ia ka jingmut jingmut ki nongrep kumno ban pynheh pynsan ia ki dohkha bad dei lyngba ka jingtrei shitom jong ki nongrep ba la lah ban poi 50 percent na ka thong ba ka sorkar ka buh ha kaban pynmih dohkha.
La ong ba haduh mynta ka jingpynmih dohkha ha ka jylla ka long haduh 19 hajar metric ton bad ka thong ba ka sorkar ka buh ka long 32 hajar metric ton katkum ka jingkhein ka National Nutritional Institute.
La ong ba ha shwa ban ioh ia ka khana sumari jong u snem 2011, ka jingmih dohkha ha jylla ka long tang 4 hajar metric ton, hynrei lyngba ka jingiarap jonng ka sorkar kmie bad ka sorkar jylla la lah ban poi sha ka 50 percent mynta..
Nga ruh nga wan na ka longïing ba die dohkha: AL Hek
